"Real Madrid" rahbariyati muhim qaror qabul qildi: yozda yangi markaziy himoyachi olinadi

Ispaniyaning nufuzli klubi "Real Madrid" kelgusi yozdagi transferlar oynasida tarkibni yanada kuchaytirish maqsadida muhim qarorga keldi. Madridliklar jamoaning markaziy himoya chizig‘ini mustahkamlash uchun yangi va tajribali futbolchi sotib olishga qaror qildi. Bu haqda Ispaniyaning ishonchli manbasi "Relevo" xabar bermoqda.

Manbaga ko‘ra, "qirollik klubi"ning mutasaddilari avvalroq markaziy himoyaga qo‘shimcha kuch jalb etishni rejalashtirmagan edilar. Biroq so‘nggi paytlarda yuzaga kelgan holatlar va futbolchilarning jismoniy muammolari bu qarorni o‘zgartirishga sabab bo‘lgan.

Xususan, germaniyalik tajribali markaziy himoyachi Antonio Ryudigerning so‘nggi paytdagi jismoniy holatidagi beqarorliklar va avstriyalik David Alabaning muntazam ravishda turli jarohatlarga duch kelayotgani "Real" rahbariyatini jiddiy xavotirga solgan. Shuning uchun klub mutasaddilari yozgi transferlar oynasida mudofaa chizig‘iga yangi, barqaror va sifatli o‘yin ko‘rsata oladigan futbolchi topishni o‘z oldiga maqsad qilib qo‘ydi.

Hozircha "Real"ning maqsadga aylangan futbolchilar haqida aniq ma’lumotlar yo‘q. Biroq manbalarning ta’kidlashicha, klub mutasaddilari aynan ushbu pozitsiyani to‘ldirish uchun bir necha variantlarni o‘rganib chiqmoqda va yaqin kunlarda asosiy nomzodlar bo‘yicha aniq ma’lumotlar oshkor qilinishi mumkin.

Ma’lumot o‘rnida ta’kidlash kerakki, "Real Madrid" joriy mavsumning 34-turidan keyin La Liga musobaqasi turnir jadvalida 75 ochko bilan ikkinchi pog‘onani egallab turibdi. Hozircha peshqadam bo‘lib turgan azaliy raqibi "Barselona"dan esa atigi to‘rt ochko ortda qolmoqda. Chempionlik uchun kurash keskin tus olgan bir paytda klub rahbariyati jamoaning mudofaa chizig‘ini yanada kuchaytirib, kelasi mavsum uchun mustahkam jamoa shakllantirishni maqsad qilgan.

Zamin.uz tahririyati vaziyatning rivojini kuzatib, "Real Madrid"ning transfer yangiliklarini o‘z o‘quvchilariga yetkazib turadi. “Zamin”ni Telegramʻda oʻqing!