Modrich so‘nggi so‘zini aytdi: “Real” muhabbati yuragimda qoladi”

Xorvatiya terma jamoasi va “Real Madrid”ning afsonaviy yarim himoyachisi Luka Modrich klub safidagi oxirgi uchrashuvidan so‘ng muxlislar bilan samimiy xayrlashdi. U jamoa klub telekanali orqali so‘nggi bor so‘zga chiqib, o‘zining tuyg‘ularini yashirmadi.

— Men uchun eng katta mukofot — bu sizlarning muhabbatingiz. Bu tuyg‘ularni ta’riflash qiyin. “Real”dagi ilk kunlarimdan to bugungacha har bir inson, har bir lahza qalbimda qoladi. Bu klub, bu muxlislar mening yuragimda abadiy yashaydi. Barchasi uchun chuqur minnatdorlik bildiraman. Hala Madrid, – dedi ko‘zlari namlangan Modrich.

13 yillik saf: raqamlar va yutuqlar

Luka Modrich 2012 yili “Real Madrid” safini to‘ldirgan edi. Shundan buyon 13 yil mobaynida u jamoaning ajralmas qismlaridan biriga aylandi. Uning hisobiga 394 ta rasmiy uchrashuv, 30 ta gol va dunyoni tan olgan mukammal o‘yinlar yozilgan.

U “Real” bilan 5 marta Chempionlar Ligasi, 3 marta La Liga, 2 marta Ispaniya kubogi va boshqa bir qator xalqaro va milliy sovrinlarni qo‘lga kiritdi. 2018 yilda esa Modrich “Oltin to‘p”ga sazovor bo‘lib, dunyo futbolidagi noyob yutuqqa erishgan futbolchilardan biriga aylandi.

Faqat raqam emas — muhabbat, sadoqat, yurak

Modrichning faoliyati faqat statistika bilan emas, balki “Santyago Bernabeu”dagi har bir muxlis uchun ramziy qiymatga ega bo‘lgan yurakdan o‘yinlar bilan esda qoldi. Uning barqarorligi, yetakchilik fazilati va professional yondoshuvi uni “Real” tarixidagi eng sehrli yarim himoyachilardan biriga aylantirdi.

Luka Modrich “Real” safidagi so‘nggi musobaqasini o‘tkazar ekan, jonli tarixni yopayapti. U ketyapti, ammo uning izi hamon Bernabeuda, hamon muxlislar yuragida qoladi. “Real”dan ketayotgan Modrich — faqat futbolchi emas, balki madridliklar uchun abadiy ruh, abadiy qadriyat. “Zamin”ni Telegramʻda oʻqing!