Vinisius va “Real” o‘rtasida kelishmovchilik: transfer yoki maosh bo‘yicha muhokamalar

Yevropa futbolida yozgi transfer oynasi avjida ekan, “Real Madrid” hujumchisi Vinisius Junior atrofida ham turli mish-mishlar, muxlislarning e’tiborini jalb etmoqda. Madrid klubi o‘zining eng asosiy futbolchilaridan biri bo‘lgan braziliyalik hujumchini sotish ehtimolini ko‘rib chiqayotgani haqida yangi ma’lumotlar paydo bo‘ldi.

"Sport" nashriga ko‘ra, “Real” rahbariyati Vinisius bilan muzokaralarda aniq pozitsiyani egallagan: agar futbolchi o‘zining yuqori maoshga bo‘lgan talablarini qayta ko‘rib chiqmasa va pasaytirmasa, klub undan voz kechishga tayyor. Bu qaror klub siyosati va moliyaviy barqarorlikni birinchi o‘ringa qo‘yayotgani bilan izohlanmoqda.

Ma’lumki, so‘nggi oylarda Vinisius va “Real” o‘rtasida yangi shartnoma borasidagi muzokaralar oson kechmayapti. 25 yoshli hujumchi o‘zini klubning yetakchi yulduzi sifatida ko‘radi va buni maoshi orqali ham tasdiqlashga intilayapti. Biroq madridliklar tarkibidagi boshqa yulduzlar bilan solishtirilganda, uning moliyaviy talablari ancha yuqori ekani klubning ehtiyotkor munosabatini kuchaytirmoqda.

Aynan shu sababli, “Real” Vinisiusni sotish masalasini ochiq qoldirgan. Agar hujumchi maoshini pasaytirishga rozi bo‘lmasa, katta ehtimol bilan yangi mavsumda uni boshqa klub libosida ko‘rishimiz mumkin. Shu bilan birga, madridliklar undan foyda olish va transferdan salmoqli daromad ko‘rish niyatida ekanini ham yashirmayapti.

Muxlislar va futbol ekspertlari bu jarayonni qiziqish bilan kuzatmoqda. Sababi, Vinisius kabi yuqori darajadagi ijrochi jamoa tarkibidan ketsa, “Real”ning hujum chizig‘i va kelajakdagi rejalariga jiddiy ta’sir qilishi mumkin. Yana bir jihat — bunday transfer Yevropa futbolidagi balansni ham o‘zgartiradi.

Ayni paytda, Vinisiusning “Real” bilan amaldagi shartnomasi 2027 yilning yarmigacha kuchda. Kelgusi haftalarda mazkur masala bo‘yicha yakuniy qaror chiqishi va futbol olamida yana yangi sensatsiyalarga sabab bo‘lishi kutilmoqda. “Zamin”ni Telegramʻda oʻqing!