Osiyo sport maydonlarida yangi nomlar, yangi yutuqlar! 30 iyuldan 12 avgustgacha Tailandning Bangkok shahrida 22 yoshgacha bo‘lgan bokschilar va yoshlar o‘rtasidagi Osiyo chempionati qizg‘in tarzda o‘tmoqda. O‘zbekiston yoshlari bu nufuzli musobaqada o‘zining barcha mahorati va irodasini namoyon qilmoqda.
Bugungi kun davomida 19 yoshgacha bo‘lgan qizlarimiz (U-19) yarim final bosqichiga yo‘l olish uchun jang maydoniga chiqishdi. Jami 7 nafar qizimiz ringda o‘z baxtini sinadi va muxlislar uchun unutilmas daqiqalarni hadya etdi.
- -48 kg vaznda Maftuna Musurmonova hindistonlik raqibi Suman Kumarini 3:2 hisobida mag‘lubiyatga uchratib, yarim finalga yo‘l oldi.
- -51 kg vaznda esa Muxtasar Aliyeva Hindiston vakilasi Yakshikaga 2:3 hisobida imkoniyatni boy berdi. Jang juda keskin va dramatik ruhda o‘tdi, ammo hakamlar g‘alabani raqibga berdi.
- -57 kg da Robiya Ravshanova hindistonlik Muskan bilan ringga chiqib, 0:5 hisobida mag‘lub bo‘ldi. Musobaqaning bu bosqichi qizg‘in va keskin kurashlarga boy bo‘ldi.
- -60 kg vaznda Sevara Mamatova yaponiyalik Mizuki Horitaga qarshi jangda 5:0 hisobida ishonchli g‘alaba qozondi va yarim finalga yo‘l oldi.
- -65 kg da Sevinch Xurramova Yaponiya vakilasi Arinda Akimotoga qarshi bahsda 0:5 hisobida mag‘lub bo‘ldi. Bu natijaga qaramay, qizimiz kurashuvchanlik va matonat ko‘rsatdi.
- -70 kg vaznda Rayhona Qurbonboyeva Xitoy Taypeyidan Chun-Ai Kaoni ringda 5:0 hisobida ustunlik bilan mag‘lubiyatga uchratdi. Qurbonboyeva jangda to‘liq ustunlikni namoyon etdi.
- -75 kg da Maftuna Yangiyeva Janubiy Koreya bokschisi Mina Jungga qarshi o‘tkazgan jangda ikkinchi raundda texnik nokaut bilan g‘alaba qozondi.
Bugungi natijalar mamlakatimiz boks maktabining yuksak darajasi va yoshlarimizdagi iroda va maqsad sari intilishni yana bir bor namoyon etdi. Musobaqa davom etmoqda va bizni oldinda yana ko‘p quvonchli lahzalar kutib turibdi.
O‘zbekiston boks federatsiyasi jamoamizning bunday muvaffaqiyatlari bilan faxrlanib, yarim finalga yo‘l olgan qizlarimizga katta ishonch va tilaklar bildirmoqda. Yangi zafarlar oldinda!
