Yevropa futbolida transfer oynasi qizg‘in pallaga kirgan bir paytda, Angliya Premer-ligasi klublari moliyaviy faoliyatda yana bir bor mutlaq yetakchi sifatida namoyon bo‘ldi. Joriy yozgi transfer davrida ularning xarajatlari boshqa chempionatlarga nisbatan keskin ustunlik qildi.
Manbalarga ko‘ra, 11 avgust holatida Premer-liga klublarining transferlar uchun sarflagan umumiy mablag‘i 2,3 milliard yevroni tashkil etdi. Bu ko‘rsatkich La Liga jamoalari sarfidan 30 barobar, Italiya A Seriyasi klublaridan esa 500 barobar ko‘p.
Italiya chempionati 834 million yevro sarflab ikkinchi o‘rinni egalladi. Germaniya Bundesligasi esa 494 million yevro bilan kuchli uchlikni yakunladi. Bu raqamlar Angliya klublari transfer bozoridagi hukmronligini yana bir bor namoyish etmoqda.
Klublarning transferdan tushgan daromadlari ham e’tiborga molik. Angliya Premer-ligasi bu borada 1,3 milliard yevro ishlab topdi. Italiya A Seriyasi 832 million yevro, Germaniya Bundesligasi esa 466 million yevro daromad qayd etdi.
Sof xarajatlarga nazar tashlasak, Premer-liga 1 milliard yevro bilan Yevropa miqyosida mutlaq yetakchi bo‘lib turibdi. A Seriyada bu ko‘rsatkich atigi 2 million yevro, Bundesligada esa 28 million yevro bo‘ldi. Bu raqamlar Angliya klublarining transfer siyosati qanchalik faol ekanini yaqqol ko‘rsatadi.
Ta’kidlash kerakki, transfer oynasi 31 avgust kuni yopiladi. Demak, oldinda yana bir necha hafta bor va bu vaqt mobaynida yangi rekordlar qayd etilishi ehtimoli juda yuqori. Muxlislar esa keyingi katta shartnomalar va kutilmagan transfer bombalari uchun intiqlik bilan kutib turishmoqda.
