Madridning mashhur klubi «Real» safida to‘p surib kelayotgan Vinisius Juniorning atrofidagi yaqinlari uning hozirgi holati va yangi murabbiy Xabi Alonso bilan munosabatlari borasida jiddiy xavotir bildirmoqda. ESPN tarqatgan ma’lumotlarga ko‘ra, braziliyalik vinger avvalgi ustozi Karlo Anchelotti qo‘l ostidagi kabi ishonchni endi ololmayapti.
Ma’lumotlarga ko‘ra, yangi murabbiy boshqaruvida Vinisius faqat bir marta to‘liq bahsni o‘tkazgan, ikki bor zaxiradan maydonga tushirilgan, sakkiz marta esa uchrashuvlar davomida zaxiraga olingan. Bu holat futbolchi va uning oilasi uchun ham, muxlislar uchun ham kutilmagan vaziyat sifatida baholanmoqda.
«Real» rahbariyati ham bu munosabatlardan xabardor va ayniqsa 25 yoshli vingerning «Marsel»ga qarshi muhim bahsda zaxirada qoldirilgani klub ichida turli savollarga sabab bo‘lgan.
Shu bilan birga, vingerning hamyurti Rodrigo chap qanotda to‘p surishga tayyorligini bildirgani va Alonsoga ushbu pozitsiyada o‘zini ko‘rsatish istagini bildirgani raqobatni yanada kuchaytirayotgani aytilmoqda.
Shubhasiz, Vinisius kabi iqtidorli futbolchining maydondagi holati va unga bo‘lgan ishonch darajasi klubning kelgusi natijalari uchun katta ahamiyat kasb etadi. Muxlislar esa «Real»ning eng ko‘zga ko‘ringan yulduzlaridan biri yana o‘zining yuqori holatiga qaytib, jamoaga muhim gollar va g‘alabalar olib kelishini kutib qolmoqda.
“Zamin”ni Telegramʻda oʻqing!
