Kannavaro – O‘zbekistonda: jahon matbuoti reaksiyasi, umid va shubhalar...

Italiya safida 2006-yilda jahon chempioni bo‘lgan Fabio Kannavaro oradan yigirma yil o‘tib murabbiy sifatida mundialda qatnashadi. Uning O‘zbekiston milliy jamoasiga bosh murabbiy etib tayinlanishi xorij OAV va mutaxassislar orasida keng muhokama tug‘dirdi — kimdadir katta umid, kimdadir esa shubha.

Milliy jamoaning hozirgi ustozi Jennaro Gattuzo odatiy hazili bilan:

«Kannavaroga qo‘ng‘iroq qilib, ‘atir sepib, sochingni gellab mundialga ketyapsan, men esa yo‘llanma uchun jangdaman’, dedim», — deb vaziyatni kulib esladi.

FIFA prezidenti Janni Infantino birinchilardan bo‘lib tabrik yo‘llab, Kannavaro 20-yil oldin Italiya sardori sifatida Kubokni ko‘targani, endi esa O‘zbekiston bosh murabbiyi sifatida jahon chempionatiga borayotganini alohida ta’kidladi.

Mashhur mutaxassis Fabio Kapello bu tayinlovni «juda to‘g‘ri qaror» deya baholadi: «U katta tajribaga ega va albatta O‘zbekistonga yordam beradi».

Ispaniyaning AS nashridan Alexandro Sato: «Kannavaro murabbiylikdagi ilk jiddiy chaqiriqqa duch keldi. Rivojlanish bosqichidagi termadan raqobatbardosh loyiha yaratish — qiziqarli, biroq juda murakkab vazifa».

FoxSports (AQSH): «O‘zbek futboli tarixida yangi sahifa ochildi».

Ispan sharhlovchisi Xose David Lopes esa keskinroq: «Bu — katta xatodir», — deya yozdi.

Karikatura ustasi Omar Mo‘maniy tayinlovdan oldinoq kulgu-ishora bilan: «Eng xursand — Abduqodir Husanov bo‘ladi», deb yozgan — ikkisi ham markaziy himoya maktabi vakillari ekaniga ishora.

Ijtimoiy tarmoqlarda «Manchester Siti» muxlislari Kannavaro qo‘lida Husanov ko‘proq bilim va tajriba olishiga ishonib, o‘z kutilmalarini oshkor qilishdi.

2+3 formulasidagi bitim: ikki yillik shartnoma, keyin yana uch yilga uzaytirish imkoni. Kannavaroga vatandoshlari — Aujenio Albarayella, Troize Fransesko va Antonio Klimenti yordam beradi.

Futbolchi sifatida «Napoli», «Inter», «Yuventus», 2006–2009 yozlarida «Real Madrid»da o‘ynagan. JCH-2006 g‘olibi, o‘sha yilgi «Oltin to‘p» sohibi — bu mukofotga erishgan yagona himoyachi.

Murabbiylikda esa yo‘li g‘ovur-tovur: «Guanchjou Evergrand», «An-Nasr», «Tyanszin», yana «Guanchjou», qisqa muddat Xitoy termasi, so‘ng «Benevento» va «Udineze». Oxirgi ish joyi — «Dinamo» Zagreb (2024-yil dekabr — 2025-yil aprel), qoniqarsiz natijalar sabab uzil-kesil ketgan.

Chet el matbuoti ikki xil kayfiyatda: biri — «yangi sahifa» deya quvonsa, yana biri xavotir bilan qaraydi. Biroq fakt o‘zgarmas: O‘zbekiston tarixida ilk bor mundialga bormoqda, Kannavaro esa jamoani jahon sahnasiga tayyorlaydi. Barqaror tarkib, to‘g‘ri tanlovlar va psixologik barqarorlik — italiyalik ustozning asosiy sinovi bo‘ladi. Muvaffaqiyat uchun mezon esa oddiy: mundialda munosib o‘yin va natija.

Muxlislar tomonidan aytilganidek: endi so‘z — maydonda.