Bugun O‘zbekiston Milliy olimpiya qo‘mitasida Norvegiyada o‘tgan og‘ir atletika bo‘yicha jahon chempionatida yurtimiz sharafini himoya qilib, yuqori natijalarga erishgan sportchilarni taqdirlash marosimi bo‘lib o‘tdi.
Tantanali tadbirda Sport vazirligi, MOQ va O‘zbekiston og‘ir atletika federatsiyasi rahbarlari ishtirok etdi. Chempionatda yuksak mahorat namoyon etgan sportchilar mehnatlari munosib baholandi.
Belgilangan marosimning eng hissiyotli lahzasi — jahon chempioni Akbar Jo‘rayevning taqdirlanishi bo‘ldi. U Norvegiyadagi musobaqada -110 kg vazn toifasida 3 ta oltin medal g‘olibi bo‘lib, mutlaq chempion unvonini qo‘lga kiritgandi. Shu munosabat bilan u Prezident sovg‘asi — BYD avtomobili hamda katta pul mukofoti bilan taqdirlandi.
Shuningdek, jahon chempionatida ikki bronza medalini qo‘lga kiritgan tajribali sportchi Ruslan Nurudinov ham esdan chiqmadi. U ham mukofotlar bilan taqdirlandi.
Marosimda sportchilar bilan bir qatorda ularning murabbiylari ham alohida ehtirom bilan e’tirof etildi. Federatsiya rahbariyati ularning fidoyi mehnati va yosh avlodga namuna bo‘layotgan sa’y-harakatlarini yuqori baholadi.
MOQ rahbariyatining ta’kidlashicha, og‘ir atletikadagi bu yutuqlar mamlakat sport tizimida amalga oshirilayotgan islohotlar samarasi ekani va bu sohada yangi avlod chempionlarini tarbiyalashga katta turtki bo‘lishi aniq.
Tadbir yakunlarida sportchilarga kelgusi musobaqalarda ham yurtimiz bayrog‘ini baland ko‘tarish, Olimpiada yo‘llanmalari uchun kurashda faol qatnashish tilaklari bildirildi.
“Zamin”ni Telegramʻda oʻqing!
