Ispaniyaning "Barselona" jamoasi uzoq tanaffusdan so'ng ilk mashg'ulotini "Kamp Nou" stadionida o'tkazadi. Bu haqda klubning rasmiy sayti xabar berdi.
2022-yildan beri stadionda rekonstruksiya ishlari olib borilayotgan edi va jamoa uy uchrashuvlarini boshqa stadionda o'tkazib kelayotgandi. Ta'mirlash ishlari hali to'liq yakunlanmagan bo'lsa-da, "Barselona" endi bu stadionda o'yin o'tkazishga ruxsat oldi.
Hozirgi kunda stadionga 26 ming tomoshabin sig'imi bilan o'yin o'tkazishga litsenziya berilgan. Klub rahbariyati bu limitni 45 mingga oshirishni kutmoqda.
Jamoaning 7-noyabrga rejalashtirilgan mashg'uloti muxlislar uchun ochiq bo'ladi. Chiptalar narxi klub a'zolari uchun 5 yevro, boshqa tomoshabinlar uchun esa 10 yevro qilib belgilangan.
Mashg'ulotdan tushgan barcha mablag' xayriya maqsadlariga yo'naltiriladi.
