Germaniya chempionatining toʻqqizinchi tur bahslarida Myunxenning "Bavariya" klubi oʻz maydonida Leverkuzenning "Bayer" jamoasini magʻlubiyatga uchratdi. Uchrashuvning birinchi boʻlimidayoq mezbonlar raqib darvozasiga javobsiz uchta gol urishga muvaffaq boʻlishdi.
Shu tariqa, "Bavariya" ketma-ket 15-oʻyinda gʻalaba qozongan boʻldi. Ushbu rekord nafaqat Germaniya chempionatida, balki joriy mavsumda qatnashayotgan barcha turnirlarni oʻz ichiga oladi.
Shundan toʻqqizta gʻalaba Bundesligada qayd etilgan boʻlib, myunxenliklar hozirgi paytda ochko yoʻqotmagan holda peshqadamlik qilmoqda. Klub tarixida bundan ham uzoqroq gʻalabali seriya faqat bir marta qayd etilgan.
2020 yilda, Xansi Flik boshchiligida, "Bavariya" ketma-ket 23 uchrashuvda zafar quchgan. Ushbu seriya ichida Chempionlar Ligasi finalida qoʻlga kiritilgan gʻalaba ham mavjud edi.
