Madridning "Real" jamoasi "Sevilya"ga qarshi o‘tkazgan bahsda navbatdagi ishonchli g‘alabani qo‘lga kiritar ekan, uchrashuv qahramonlaridan biri Kilian Mbappe bo‘ldi. Fransiyalik yulduz jamoasining ikkinchi golini urib, uni afsonaviy Krishtianu Ronalduga xos nishonlash uslubida nishonladi.
Bu gol Mbappe uchun alohida ahamiyatga ega bo‘ldi. Chunki u 2025 yil davomida urgan 59-goli orqali Krishtianu Ronalduning 2013 yilda “Real” safida qayd etgan tarixiy natijasini takrorladi. Shu tariqa, Kilian o‘z nomini klub tarixidagi eng samarali futbolchilar qatoriga yana bir bor yozib qo‘ydi.
Uchrashuvdan so‘ng Mbappe ushbu gol va uning nishonlanishi haqida samimiy fikrlar bildirdi. Uning aytishicha, Ronaldu nafaqat do‘sti, balki bolalikdan kumiri hisoblanadi.
«Krishtianu — men uchun juda yaqin inson va futboldagi ilhom manbaim. Bu golni aynan unga bag‘ishladim. U “Real”ga moslashishimda menga katta yordam bergan. Shu orqali unga minnatdorligimni bildirmoqchi bo‘ldim va Yangi yil bilan tabriklayman», — dedi Mbappe.
Fransiyalik hujumchi odatda o‘ziga xos nishonlash uslubiga ega ekanini ta’kidlar ekan, bu gal ataylab Ronalduning mashhur harakatini takrorlashni istaganini ham qo‘shimcha qildi.
Madrid muxlislari uchun esa bu gol shunchaki statistik natija emas, balki avlodlar davomiyligini, afsonalar izidan kelayotgan yangi yulduzni yaqqol namoyon etgan lahza sifatida yodda qoldi.
“Zamin”ni Telegramʻda oʻqing!
Mehmon guruhidagi foydalanuvchilar ushbu nashrga izoh qoldira olmaydi.
