Futbolda ba’zan bir mutaxassisning kelishi jamoa uchun yangi nafas, yangi tartib va yangi ishtiyoq degani bo‘ladi. Ana shunday tajribaga ega kadrlardan biri — moldovalik mutaxassis Emilian Karas. U turli mamlakatlar va turli chempionatlarda yordamchi murabbiy sifatida ishlab, katta futbol muhitida “puxta pishgan” kadr sifatida tanilgan.
Karas faoliyati davomida Ukraina chempionatida ishtirok etgan jamoalarda, shuningdek, Rossiyaning “Alaniya”, “Kuban” va Moskva “Dinamo”sida ham yordamchi murabbiy lavozimida ishlagan. Bundan tashqari, u Qatarning “Al Arabi” klubi hamda BAAning “Al Nassr” jamoasida ham murabbiylar shtabida faoliyat yuritgan. Qisqasi, bu insonning rezyumesi “bir joyda o‘tirgan mutaxassis” emas, turli muhitda sinovdan o‘tgan amaliyotchi ekanini ko‘rsatadi.
Moldovalik mutaxassis futbolchilik karerasida himoyachi ampluasida to‘p surgan. Uning o‘yinchi sifatidagi faoliyatining asosiy qismi o‘z yurtida o‘tgan bo‘lsa-da, muayyan davrlarda turli maydonlarda tajriba orttirgani ham ma’lum. E’tiborli jihati shundaki, Karas O‘zbekiston futboli bilan ham ilgaridan tanish.
Xususan, 1991-yilda u “Paxtakor” Markaziy stadionida Toshkent klubiga qarshi bahsda maydonga tushgan. Demak, u nafaqat bu yerda ishlash uchun kelgan, balki O‘zbekiston futboli muhitini o‘z ko‘zi bilan ko‘rgan, tribuna ruhini his qilgan mutaxassis hisoblanadi.
Karasning bugungi maqsadi ham aniq va qat’iy: jamoa bilan birga yuqori natijaga chiqish, bosh murabbiyga maksimal darajada ko‘maklashish va eng asosiysi — chempionlik uchun kurashish.
“O‘z paytida Sobiq Ittifoqning, bugungi kunda Osiyoda o‘z o‘rniga ega O‘zbekistonning eng zo‘r jamoasida faoliyat olib borish men uchun zavqli bo‘ladi. Bosh murabbiyga qo‘ldan kelgancha yordam beraman. Niyatim, jamoamga nafim teggan holda mamlakat chempionligini qo‘lga kiritish”, — deydi Emilian Karas.
Shu so‘zlarning o‘zi ham uning bu yerga “shunchaki ish” uchun emas, aniq vazifa va katta ishtiyoq bilan kelganini ko‘rsatadi. Endi esa barcha muxlislarda tabiiy savol bor: Karasning tajribasi jamoaga qay darajada foyda beradi va bu ish amalda ham chempionlikka olib bora oladimi? Vaqt hammasini ko‘rsatadi, ammo startdagi niyat — juda jiddiy.
“Zamin”ni Telegramʻda oʻqing!
