Niderlandiyalik afsonaviy futbolchi Ruud Gullit Diego Simeoneni barcha davrlarning eng yaxshi murabbiylaridan biri deb atadi. Uning fikricha, argentinalik mutaxassis futbol olamida o'zi loyiq bo'lgan e'tirofga to'liq erisha olmayapti. Bu haqda Goal.com xabar beradi.
Simeone 2011-yildan buyon «Atletiko» klubini boshqarib, jamoani inqirozdan olib chiqdi.
«Cholo» laqabi bilan mashhur murabbiy Madridning ikkinchi klubi bilan sakkizta sovrin, jumladan, ikki marta Ispaniya chempionligini qo'lga kiritdi. Uning qo'l ostida jamoa to'rtinchi bor Yevropa Chempionlar ligasining yarim finaliga yo'llanma oldi.
Bu natijalar «Atletiko»ni qit'aning eng kuchli klublari qatoriga qaytardi.
Simeonening o'yin uslubi ko'pincha tanqid qilinadi, biroq uning 2013-2014-yilgi mavsumdagi g'alabasi futbol tarixidagi eng buyuk yutuqlardan biri hisoblanadi. O'shanda u «Real Madrid» va «Barselona»ning o'n yillik gegemonligini tugatib, Lionel Messi va Krishtianu Ronaldu jamoalarini ortda qoldirgan edi.
Hozirgi kunda 55 yoshli mutaxassis zamonaviy futbol talablariga moslashishga harakat qilmoqda. U o'yin tezligi oshganini va o'z uslublarini yangilash zarurligini tan oldi.
Shunga qaramay, Simeone «Atletiko» uchun nafaqat murabbiy, balki butun jamoaning jangovar ruhini belgilab beruvchi asosiy timsol bo'lib qolmoqda.
“Zamin”ni Telegramʻda oʻqing!
