Portugaliyaning "Benfika" klubi bosh murabbiy Joze Mourinyo o'rniga munosib nomzod topdi. Lissabonliklar ayni damda Angliyaning "Fulxem" klubini boshqarayotgan Marko Silvani o'z safiga chorlamoqchi. Bu haqda Goal.com xabar beradi.
Ushbu vaziyat yangi murabbiy qidirayotgan Londonning "Chelsi" klubi rejalariga jiddiy xalaqit berishi mumkin.
Mourinyo 2027-yilgacha shartnomasi bo'lishiga qaramay, Madridning "Real" klubiga qaytishi haqidagi xabarlar ko'paygan. Shu sababli "Benfika" rahbariyati bo'shab qolishi mumkin bo'lgan o'rinni Silva bilan to'ldirishni maqsad qilgan.
Londonliklar ham Liam Rozenior ketganidan so'ng aynan ushbu mutaxassisni asosiy nomzodlar ro'yxatiga kiritgan edi.
"Chelsi" sport direktorlari jamoani barqarorlashtira oladigan tajribali murabbiy qidirmoqda. Hozirda jamoani vaqtincha Kalum Makfarlan boshqarib turibdi.
Marko Silva "Fulxem"da chiroyli o'yin uslubi shakllantirgani bilan e'tiborga tushgan bo'lsa-da, uning kuchli oltilik klublarida tajribasi yo'qligi London klubi ichida bahslarga sabab bo'lmoqda.
Silvaning "Fulxem" bilan amaldagi shartnomasi 2026-yilning iyunigacha davom etadi. Agar Mourinyo haqiqatdan ham Madridga yo'l olsa, ikki klub o'rtasida portugaliyalik mutaxassis uchun jiddiy kurash boshlanishi kutilmoqda.
Hozircha "Chelsi" o'z o'rganishlarini davom ettirmoqda, biroq "Benfika"ning faollashishi ularni tezroq qaror qabul qilishga majbur qilishi mumkin.
“Zamin”ni Telegramʻda oʻqing!
