Barselona oʻz uyida Real Madridni qabul qilishga tayyorgarlik koʻrmoqda va bu uchrashuv klub tarixida yangi sahifa ochishi mumkin. Kataloniyaliklar ayni damda turnir jadvalida raqibidan 11 ochko oldinda bormoqda va yakshanba kungi gʻalaba ularga muddatidan avval Ispaniya chempionligini taqdim etadi. Tarixda ilk bor Barselona aynan El-Klasiko doirasida chempionlik masalasini hal qilish imkoniyatiga ega. Bu haqda Goal.com xabar beradi.
Hansi Flick qoʻl ostidagi Barselona joriy mavsumda oʻz maydonida haqiqiy qalʼa barpo etdi. Jamoa uy uchrashuvlarida 100 foizlik natija qayd etib, raqiblariga deyarli imkon qoldirmayapti. Shu bilan birga, bu oʻyin nafaqat chempionlik, balki oʻzaro qarama-qarshiliklardagi statistikani tenglashtirish uchun ham muhim ahamiyat kasb etadi. Hozirda Real Madrid 106 ta, Barselona esa 105 ta gʻalabaga ega.
Real Madrid esa safar oʻyinlarida barqarorlikni yoʻqotib qoʻydi. Alvaro Arbeloa shogirdlari bu mavsumda mehmondagi bahslarda koʻplab ochkolar yoʻqotishdi, bu esa Barselonaning jadvalda yaqqol peshqadam boʻlib olishiga zamin yaratdi. Kataloniyaliklar Superkubok finalidagi muvaffaqiyatdan soʻng ruhiy ustunlikka ega va oʻz muxlislari qarshisida chempionlikni tantana qilishni maqsad qilgan.
“Zamin”ni Telegramʻda oʻqing!
