Cristiano Ronaldo o‘zining yorqin faoliyatida navbatdagi tarixiy marrani zabt etdi. Saudiya Arabistoni chempionati doirasida "Al-Shabab"ga qarshi kechgan bahsda (4:2) portugaliyalik afsonaviy hujumchi o‘zining 100-golini nishonladi. Sadio Mane tomonidan uzatilgan to‘pni darvozaga aniq yo‘llagan Ronaldo, jamoasining g‘alabasiga munosib hissa qo‘shdi. Bu haqda Goal.com xabar beradi.
Uchrashuv qahramoni esa Joao Felix bo‘ldi. U o‘yin davomida xet-trik qayd etib, "Al-Nassr"ning hujum chizig‘ida yetakchilik qildi. Felix uchrashuvning 3-daqiqasidayoq hisobni ochdi, 10-daqiqada esa ikkinchi golini urdi. O‘yinning so‘nggi daqiqalarida penaltini aniq amalga oshirgan futbolchi o‘zining uchinchi golini nishonlab, yakuniy hisobni o‘rnatdi.
"Al-Shabab" safida Yannick Carrasco va Ali Al-Bulaihi gol urishgan bo‘lsa-da, bu mezbonlarga ochko olish uchun yetarli bo‘lmadi. Ushbu g‘alabadan so‘ng "Al-Nassr" turnir jadvalida peshqadamlikni mustahkamlab, eng yaqin ta'qibchisi "Al-Hilal"dan 5 ochko oldinga o‘tib oldi.
Jorj Jezus shogirdlari chempionlik sari dadil odimlamoqda. Ronaldo esa joriy mavsumda chempionatdagi barcha raqiblar darvozasini ishg‘ol qilishga muvaffaq bo‘ldi. Oldinda jamoani "Al-Hilal"ga qarshi hal qiluvchi to‘qnashuv kutib turibdi.
“Zamin”ni Telegramʻda oʻqing!
