Italiyaning Milan klubi Real Madrid himoyachisi David Alaba bilan shartnoma imzolash imkoniyatlarini ko‘rib chiqmoqda. Klub rahbariyati taniqli agent Pini Zahavi bilan muzokaralar o‘tkazib, avstriyalik futbolchini erkin agent sifatida tarkibga qo‘shib olish variantini muhokama qildi. Bu haqda Goal.com xabar beradi.
Dastlabki muzokaralar Robert Lewandowski atrofida kechgan bo‘lsa-da, hujumchining yuqori maosh talablari Milan uchun moliyaviy to‘siq bo‘ldi. Shundan so‘ng, e’tibor Zahavining yana bir mijozi bo‘lgan 33 yoshli David Alabaga qaratildi. Tajribali himoyachining Madrid klubi bilan amaldagi shartnomasi yakunlanib borayotgani italyanlar uchun qulay imkoniyat sifatida baholanmoqda.
Milan murabbiylar shtabi Alabaning ko‘p funksiyali o‘yinchi ekanligini yuqori baholamoqda. U markaziy himoyachi, qanot himoyachisi yoki tayanch yarim himoyachi pozitsiyalarida birdek harakat qila oladi. Bu esa jamoa himoya chizig‘ini sezilarli darajada kuchaytirishi mumkin.
Shunga qaramay, futbolchining so‘nggi yillardagi jarohatlari klub rahbariyatini xavotirga solmoqda. Alabaning jismoniy holati va uzoq muddat safdan chiqishi A Seriya kabi talabchan chempionatda barqaror o‘yin ko‘rsatishiga to‘sqinlik qilishi mumkinligi aytilmoqda.
“Zamin”ni Telegramʻda oʻqing!
