Niderlandiyalik sobiq futbolchi Uesli Sneyder Arsenal jamoasini Chempionlar ligasi finalida Pari Sen-Jermen bilan to‘qnashuvda ehtiyot bo‘lishga chaqirdi. Uning fikricha, agar londonliklar himoyada mutlaq intizomni saqlay olmasalar, Pari Sen-Jermen o‘tgan mavsumda Inter darvozasiga javobsiz kiritilgan beshta gol kabi yirik hisobni takrorlashi mumkin. Bu haqda Goal.com xabar beradi.
Mikel Arteta shogirdlari yarim finalda Atletiko Madrid ustidan qiyin g‘alaba qozonib, 2006-yildan buyon ilk bor Chempionlar ligasi finaliga yo‘l olishdi. Ayni damda Angliya Premer-ligasi chempionligi uchun ham kurashayotgan Arsenal 30-may kuni bo‘lib o‘tadigan hal qiluvchi bahsda Luis Enrike boshchiligidagi Pari Sen-Jermen bilan kuch sinashadi.
Sneyder Hard Rock Bet nashriga bergan intervyusida Arsenal himoyachilari sifatini e’tirof etgan bo‘lsa-da, qanotlardagi himoya zaifligidan xavotirda ekanini bildirdi. Uning so‘zlariga ko‘ra, Pari Sen-Jermen ayniqsa chap qanotda juda kuchli va bu Arsenal uchun jiddiy muammo tug‘dirishi mumkin. Shuningdek, u Declan Rice himoyaga yordam berish uchun orqaga qaytishi muhimligini ta’kidladi.
Sobiq yarim himoyachi final uchrashuvi qanday kechishi mumkinligi haqida o‘z bashoratini berdi: "Menimcha, bu o‘yin Pari Sen-Jermen foydasiga 3:0 yoki 4:0 hisobida yakunlanishi mumkin. Biroq, agar Arsenal himoyada mukammal o‘ynab, 1:0 hisobida g‘alaba qozonsa, bu ular uchun ulkan yutuq bo‘ladi. Pari Sen-Jermenga gol urish imkonini bermaslik juda qiyin vazifa".
“Zamin”ni Telegramʻda oʻqing!
