Chelsi sobiq himoyachisi William Gallas klub rahbariyatini Xabi Alonso nomzodidan voz kechib, Cesc Fabregasni bosh murabbiy etib tayinlashga chaqirdi. Gallasning fikricha, Italiyaning Como klubi bilan tarixiy natijalarga erishgan va Yevropa musobaqalari yo‘llanmasini qo‘lga kiritgan Fabregas London klubi uchun ideal variant hisoblanadi. Bu haqda Goal.com xabar beradi.
Gallasning ta’kidlashicha, Alonso Bayer Leverkusen bilan ajoyib mavsumni o‘tkazgan bo‘lsa-da, uning Real Madriddagi tajribasi unchalik muvaffaqiyatli chiqmagan. Sobiq futbolchi yosh murabbiylarga vaqt berish kerakligini va Fabregasning o‘z jamoasida shakllantirgan o‘yin uslubi Chelsi yosh tarkibi uchun mos kelishini ta’kidladi.
Shuningdek, Gallas Chelsi kiyinish xonasidagi intizom masalasiga ham to‘xtalib o‘tdi. Uning so‘zlariga ko‘ra, hozirgi yosh futbolchilar bilan ishlashda murabbiy nafaqat taktik bilimga, balki psixologik yondashuvga ham ega bo‘lishi shart. Enzo Fernandez va Marc Cucurella kabi o‘yinchilar bilan muloqotda ehtiyotkorlik talab etiladi.
Chelsi ayni damda Angliya Premer-ligasida qiyin ahvolda qolgan va mavsum taqdiri 16-may kuni Manchester Siti jamoasiga qarshi bo‘lib o‘tadigan Angliya kubogi finalida hal bo‘ladi. Klub rahbariyati kelasi mavsum uchun yangi murabbiy masalasida yakuniy qarorga kelishi kerak.
“Zamin”ni Telegramʻda oʻqing!
