Xarvi Elliott juma oqshomida o‘zining asosiy klubi Liverpulga qarshi bahsda Aston Villa safida maydonga tusha olmaydi. Biroq bosh murabbiy Unai Emeri uni baribir tarkibga kiritmagan bo‘lardi. Gap shundaki, Elliott mart oyidan buyon bir daqiqa ham o‘ynamadi, chunki u yana bitta o‘yinda maydonga tushsa, Aston Villa uni 35 million funt sterling evaziga sotib olish majburiyatini oladi. Klub esa bu xarajatni amalga oshirish niyatida emas. Bu haqda Goal.com xabar beradi.
Emeri mavsum boshidayoq yosh hujumkor yarim himoyachini o‘z rejalariga kiritmaganini ko‘rsatib qo‘ydi. Yozda Liverpulga qaytishi deyarli aniq bo‘lgan futbolchining kelajagi ham so‘roq ostida, chunki yangi murabbiy Arne Slot ham uning o‘yin uslubini yuqori baholamayapti. Bu holat avvallari Angliyaning eng iqtidorli yosh futbolchilaridan biri deb hisoblangan Elliott uchun juda achinarli.
Yurgen Klopp Liverpuldan ketishidan oldin bergan intervyusida Xarvi Elliottga yetarlicha o‘yin vaqti bermaganidan afsusda ekanini yashirmagan edi. Klopp uni jamoaning eng yaxshi futbolchilaridan biri deb atab, ayniqsa yanvar oyidagi jarohatlar davrida uning xizmatlari beqiyos bo‘lganini ta’kidlagandi. Elliott esa Kloppni afsona deb biladi va uning murabbiylik faoliyatini doimo hurmat qilgan.
2023-24 yilgi mavsum yakunida Elliott 53 ta o‘yinda maydonga tushib, o‘z faoliyatidagi eng yuqori natijani qayd etgandi. 21 yoshli futbolchi Arne Slot tizimidagi "o‘nlik" pozitsiyasiga juda mos tushishi kutilayotgan edi. Mavsumoldi tayyorgarlik jarayonida ko‘rsatgan mehnatkashligi va ijodkorligi uning asosiy tarkib uchun kurasha olishiga umid uyg‘otgan bo‘lsa-da, hozirgi vaziyat butunlay boshqacha tus oldi.
“Zamin”ni Telegramʻda oʻqing!
