Real Madrid klubi o‘z sardori Dani Carvajal yozgi transfer oynasida jamoani tark etishini rasman tasdiqladi. 23 yillik hamkorlikdan so‘ng, ispaniyalik himoyachi erkin agent sifatida faoliyatini boshqa klubda davom ettiradi. Bu qaror tomonlarning o‘zaro kelishuvi asosida qabul qilindi. Bu haqda Goal.com xabar beradi.
2002-yildan buyon klub akademiyasida tarbiyalangan va asosiy tarkibda 13 mavsum davomida to‘p surgan Dani Carvajal futbol tarixidagi eng sovrindor o‘yinchilardan biri hisoblanadi. Jarohatlar tufayli joriy mavsumda atigi 22 ta o‘yinda maydonga tushgan tajribali himoyachi yangi chaqiriqlarga tayyorligini bildirgan.
Real Madrid prezidenti Florentino Perez klub afsonasiga yuksak baho berdi: “Dani Carvajal – klubimiz va akademiyamiz ramzi. Uning Real Madrid qadriyatlarini namoyon etishi har bir madridistaning qalbida abadiy qoladi. Bu yer har doim uning uyi bo‘lib qoladi”.
Carvajal Madrid klubi safida 27 ta sovrinni qo‘lga kiritgan. U olti marta Chempionlar ligasi g‘olibi bo‘lgan tarixdagi besh futbolchidan biri hisoblanadi. Shuningdek, uning hisobida to‘rtta La Liga chempionligi va ko‘plab xalqaro sovrinlar mavjud.
“Zamin”ni Telegramʻda oʻqing!
