Germaniya kubogi finalida Bavariya jamoasining 3:0 hisobidagi gʻalabasidan soʻng, Myunxen klubi faxriy prezidenti Uli Hoeneß muxlislarning xatti-harakatlaridan gʻazabga keldi. Oʻyin davomida har ikki jamoa ishqibozlari Germaniya futbol ittifoqiga (DFB) qarshi birgalikda norozilik namoyishlarini oʻtkazishdi. Hoeneß Sky nashriga bergan intervyusida: “Bugun har ikki tomon muxlislari qilgan ish — bu shunchaki sharmandalik. Ular oʻyinni butunlay buzishdi”, — deya taʼkidladi. Bu haqda Goal.com xabar beradi.
Uchrashuvning ikkinchi boʻlimi boshida Berlin Olimpiya stadionida DFB logotipi chizilgan va ustidan chiziq tortilgan ulkan banner bir tribunadan ikkinchisiga oʻtkazildi. Muxlislar “Raqiblar birlashdi: DFB, yoʻqol!” mazmunidagi bannerlarni koʻtarib, tashkilotga qarshi hayqiriqlar bilan stadionni toʻldirishdi. Norozilikning asosiy sababi sifatida Germaniya kubogi finali uchun chipta narxlarining haddan tashqari qimmatligi (45 yevrodan 195 yevrogacha) koʻrsatilgan.
Norozilik namoyishlari davomida ishqibozlar koʻplab pirotexnika vositalarini yoqishdi, natijada maydonni quyuq tutun qopladi. Hakam Sven Jablonski oʻyinni bir muddat toʻxtatishga majbur boʻldi. “Ikkinchi boʻlimda shunday lahzalar boʻldiki, men hech narsani koʻra olmadim. Agar muxlislar bayram qilishni shunday tasavvur qilishsa, men bunga qarshiman”, — dedi Hoeneß.
Bavariya faxriy prezidenti klublar, DFB va siyosatchilarni bunday “beadablik”ka qarshi keskin choralar koʻrishga chaqirdi. Maydondagi voqealarga toʻxtalsak, myunxenliklar 55-daqiqada Harry Kane tomonidan urilgan gol evaziga hisobni ochishdi. Birinchi boʻlimda Shtutgart jiddiy qarshilik koʻrsatgan boʻlsa-da, tanaffusdan soʻng chempionlar oʻyin tizginini oʻz qoʻllariga olishdi va ishonchli gʻalabani qoʻlga kiritishdi.
“Zamin”ni Telegramʻda oʻqing!
