Arsenal himoyachisi Riccardo Calafiori jamoasining Angliya Premer-ligasidagi tarixiy gʻalabasidan soʻng kiyinish xonasida yuz bergan hayajonli lahzalar haqida soʻzlab berdi. Italiyalik futbolchining tan olishicha, Manchester Siti jamoasining Bornmutda ochko yoʻqotishi 22 yillik tanaffusdan soʻng kutilgan chempionlikni rasmiylashtirib, jamoada haqiqiy hissiyotlar portlashiga sabab boʻlgan. Bu haqda Goal.com xabar beradi.
Mavsum davomida 26 ta oʻyinda maydonga tushgan Riccardo Calafiori Chempionlar ligasi finali doirasidagi Pari Sen-Jermen bilan bahs oldidan oʻz xotiralari bilan boʻlishdi. Arsenal 19-may kuni rasman chempionlikni qoʻlga kiritgan edi. Mikel Arteta shogirdlari soʻnggi turda Kristal Pelas ustidan 2:1 hisobida gʻalaba qozonib, eng yaqin taʼqibchisidan yetti ochko oʻzib ketishdi.
"Angliya Premer-ligasida gʻolib chiqish bolalikdagi orzularimdan biri edi. Bornmut va Manchester Siti oʻrtasidagi oʻyinning yakuniy hushtagi yangragan lahza eng baxtli damimiz boʻldi. Oʻshanda barcha — murabbiylar shtabi, futbolchilar birdek quvondik. Shahar boʻylab sayr qilar ekanman, bu gʻalaba muxlislar uchun qanchalik muhimligini his qildim", — deydi Riccardo Calafiori.
Himoyachi, shuningdek, Mikel Arteta qoʻl ostida moslashish jarayoni haqida ham toʻxtalib oʻtdi. Uning soʻzlariga koʻra, Angliya chempionati Italiya A Seriyasidan ish tartibi va oʻyinlar intensivligi bilan tubdan farq qiladi. Arsenal klubining murabbiyga vaqt bergani va uzoq muddatli loyihaga ishongani yakunda oʻz mevasini berganini taʼkidladi.
Hozirda London klubi bor eʼtiborini Parij klubiga qarshi boʻladigan Chempionlar ligasi finaliga qaratgan. Riccardo Calafiori haftalik ish tartibi va tiklanish jarayonlari Yevropada eng yuqori darajada ekanligini, bu esa jismoniy holatni saqlab qolishda muhimligini qoʻshimcha qildi.
“Zamin”ni Telegramʻda oʻqing!
