Janubiy Koreya olimlari og‘ir qon ketish holatlarida hayot saqlab qolishi mumkin bo‘lgan yangi ishlanmani taqdim etdi: yaraga sepilganda qon bilan reaksiyaga kirishib, taxminan bir soniya ichida “gel to‘siq” hosil qiladigan kukun-sprey. Bu haqda SciTechDaily’dagi materiallarga tayanilgan xabarlar tarqaldi, Koreya rasmiy manbalarida ham ishlanma haqida ma’lumot berilgan.
Manbalarga ko‘ra, ishlanma KAIST (Korea Advanced Institute of Science and Technology) tadqiqotchilari tomonidan tayyorlangan va birinchi navbatda harbiy sharoit — ya’ni tez yordam kechikishi mumkin bo‘lgan vaziyatlarda qon yo‘qotishni to‘xtatish uchun ko‘zlangan. Jang maydonida soniyalar hal qiluvchi bo‘lgani uchun, bunday “tezda ishga tushadigan” vosita katta ahamiyatga ega bo‘lishi mumkin.
Qanday ishlaydi? Qisqacha qilib aytganda, bu kukun tarkibidagi biomuvofiq moddalar qondagi ionlar (ayniqsa kalsiy ionlari) bilan tez reaksiya qilib, bir soniya atrofida gelsimon qatlamga aylanadi va yarani “berkitib” qo‘yadi. Shu bilan birga, material qonni juda ko‘p miqdorda singdira oladi — manbalarda kukun o‘z og‘irligining bir necha barobaricha qonni torta olishi qayd etilgan, bu esa kuchli qon ketishda ham to‘sqinlikni tezroq hosil qilishga yordam beradi.
“Zamin”ni Telegramʻda oʻqing!
