Honor noutbuklar uchun 360 vattli GaN quvvatlagichini taqdim etdi
Honor kompaniyasi o‘yin noutbuklari va yuqori quvvat talab qiluvchi qurilmalar uchun mo‘ljallangan 360 vattli "WIN 360W GaN Adapter"ni namoyish etdi. GaN va SiC texnologiyalari asosida yaratilgan ushbu qurilma yuqori samaradorlikni ta’minlaydi hamda o‘zining ixcham o‘lchamlari va yengilligi bilan ajralib turadi. Adapter klassik DC-ulagich orqali ulanadi va uzoq vaqt davomida og‘ir yuklamalar ostida qizib ketmasdan ishlashga moslashgan. Hozirda ushbu yangilik Xitoy bozorida taxminan 70 dollar qiymatida baholanmoqda.
Honor kompaniyasi o'yin noutbuklari va boshqa yuqori quvvat talab qiluvchi qurilmalar uchun mo'ljallangan "WIN 360W GaN Adapter" yangi quvvatlantirish blokini namoyish etdi. Mazkur adapter 360 vattgacha quvvat berish imkoniyatiga ega bo'lib, birinchi navbatda brendning o'z mahsulotlari, jumladan, yangi "Win H9" modeli uchun ishlab chiqilgan. Shuningdek, u boshqa mos keluvchi noutbuklar bilan ham ishlashi mumkin. Bu haqda Ixbt.com xabar beradi.
Qurilmaning o'ziga xos jihati shundaki, u USB-C o'rniga klassik doirasimon DC-ulagich orqali ulanadi. Bu holat moslashuvchanlikni biroz cheklasa-da, adapterga ancha yuqori yuklama bilan ishlash imkonini beradi. Qurilma o'lchamlari 85 x 85 x 33 millimetrni, vazni esa taxminan 420 grammni tashkil etadi. Bunday quvvat darajasi uchun adapter ancha ixcham ko'rinishga ega.
Yangi blokda GaN va SiC texnologiyalari qo'llanilgan bo'lib, ular yuqori samaradorlikni ta'minlaydi va qizib ketishning oldini oladi. Ishlab chiqaruvchining ta'kidlashicha, qurilmada uzoq vaqt davomida og'ir yuklama ostida ishlashga mo'ljallangan avtomobil darajasidagi butlovchi qismlar ishlatilgan. Xitoy bozorida ushbu yangilik taxminan 70 dollar qiymatida baholandi.
Izohlar 0
…