Kriptovalyuta bozori nisbatan sokin davrni boshdan kechirayotganiga qaramay, a16zcrypto kompaniyasi yangi, 2,2 milliard dollarlik jamgʻarma tashkil etilganini eʼlon qildi. Bu venchur fondining beshinchi yirik loyihasi boʻlib, uning umumiy mablagʻlari hajmi 9,8 milliard dollarga yetdi. Kompaniya oʻzining texnik direktori Eddy Lazzarinni bosh hamkor (General Partner) lavozimiga koʻtardi. Bu haqda Techcrunch.com xabar beradi.
Hozirgi vaqtda kripto birjalarida savdo hajmi sezilarli darajada kamaygan. Masalan, CoinGecko maʼlumotlariga koʻra, mart oyi 2023-yil noyabridan buyon kripto savdosi eng sust oʻtgan oy boʻldi. Shuningdek, DefiLlama statistikasi venchur investitsiyalar ham oʻtgan yilga nisbatan qisqarganini koʻrsatmoqda.
Bozordagi pasayishga qaramay, a16zcrypto hamkorlari bu davrni yangi texnologiyalarni yaratish uchun qulay fursat deb bilishadi. Ularning fikricha, aynan shunday sokin pallada yaratilgan loyihalar kelajakda yanada barqaror va foydali boʻlib chiqadi. Shunga qaramay, koʻplab yirik venchur fondlar hozirda eʼtiborini sunʼiy intellekt (AI) sohasiga qaratmoqda.
Bozordagi raqobat va AI sohasining jozibadorligi ortib borayotganiga qaramay, a16zcrypto oʻz strategiyasini oʻzgartirmaydi. Kompaniya vakillarining taʼkidlashicha, yangi jamgʻarma 100 foiz kripto-tadbirkorlarni qoʻllab-quvvatlashga va blokcheyn texnologiyalarini rivojlantirishga yoʻnaltiriladi.
“Zamin”ni Telegramʻda oʻqing!
