Google o‘zining sun’iy intellekt (AI) asosidagi qidiruv tajribasini yangilamoqda. Endilikda tizim foydalanuvchilarga nafaqat rasmiy manbalar, balki Reddit kabi forumlar va ijtimoiy tarmoqlardagi muhokamalardan olingan javoblarni ham taqdim etadi. Shuningdek, foydalanuvchilar obuna bo‘lgan yangiliklar manbalari ham qidiruv natijalarida alohida ajratib ko‘rsatiladi. Bu haqda Techcrunch.com xabar beradi.
Google avvalroq qidiruv tizimiga "AI Overview" funksiyasini joriy etgan edi, biroq bu yangilik foydalanuvchilar tomonidan turlicha qabul qilindi. Tizim ba’zida kinoya yoki noto‘g‘ri ma’lumotlarni ajrata olmay, kulgili va xavfli tavsiyalarni berib qo‘ygan holatlar kuzatildi. Garchi sun’iy intellekt ancha takomillashgan bo‘lsa-da, LLM texnologiyalari uchun xos bo‘lgan "gallyutsinatsiyalar" yoki noto‘g‘ri faktlarni taqdim etish xavfi hali ham saqlanib qolmoqda.
New York Times tahliliga ko‘ra, AI tomonidan berilgan javoblarning 90 foizi to‘g‘ri. Biroq Google kuniga trillionlab so‘rovlarni qayta ishlashini hisobga olsak, qolgan 10 foizlik xatolik ko‘lami juda katta bo‘lishi mumkin. Aynan shu sababli kompaniya foydalanuvchilarning o‘zaro fikr almashinuviga tayanib, qidiruv natijalarini boyitishga qaror qildi. Ko‘pchilik foydalanuvchilar qidiruv so‘rovlariga ataylab "Reddit" so‘zini qo‘shib yozishi ham aynan jonli tajribaga bo‘lgan ehtiyojdan dalolat beradi.
Yangi funksiya doirasida Google ma’lumot manbalariga oid qo‘shimcha kontekstni, jumladan, muallif nomi yoki hamjamiyat nomini ham ko‘rsatib boradi. Bu foydalanuvchilarga ma’lumotning ishonchliligini baholashga yordam berishi kerak. Shunga qaramay, mutaxassislar AI tomonidan keltirilgan iqtiboslarni har doim qayta tekshirishni tavsiya etishmoqda, chunki ChatGPT yoki Claude kabi tizimlar ham ba’zida noto‘g‘ri manbalarga havola berishi mumkin.
“Zamin”ni Telegramʻda oʻqing!
