Media magnat Barry Diller OpenAI rahbari Sam Altman bilan shaxsiy munosabatlari yaxshi ekanini va uni samimiy inson deb bilishini taʼkidladi. Altman baʼzi sobiq hamkasblari tomonidan manipulyatsiyada ayblanayotgan boʻlsa-da, Diller uning qadriyatlariga shubha qilmaydi. Bu haqda Techcrunch.com xabar beradi.
Biroq, The Wall Street Journal konferensiyasida soʻzga chiqqan Diller, sunʼiy intellekt sohasidagi asosiy muammo shaxsiy ishonch emas, balki texnologiyaning kutilmagan oqibatlari ekanini aytdi. Uning fikricha, hatto sunʼiy intellektni yaratuvchilarning oʻzlari ham kelajakda nimalar yuz berishini toʻliq tasavvur qila olmaydi.
Diller AGI (Sunʼiy umumiy intellekt) insoniyat uchun katta oʻzgarishlar olib kelishini taʼkidladi. Uning soʻzlariga koʻra, texnologik taraqqiyot shunchalik tezlashganki, biz AGI davriga juda yaqin qoldik, ammo bu jarayonni nazorat qilish uchun yetarli himoya mexanizmlari hali ishlab chiqilmagan.
Media ekspertning ogohlantirishicha, agar insoniyat sunʼiy intellekt ustidan nazoratni oʻz qoʻlida ushlab qolmasa, AGI oʻz qoidalarini oʻzi belgilay boshlaydi. Bunday holat yuz bergach, ortga qaytishning iloji boʻlmaydi, shuning uchun xavfsizlik choralarini hozirdanoq koʻrish zarur.
“Zamin”ni Telegramʻda oʻqing!
