AQSh Milliy yo‘l harakati xavfsizligi boshqarmasi (NHTSA) 2026-yilgi Tesla Model Y modeli agentlikning ilg‘or haydovchiga yordam berish tizimlari uchun belgilangan yangi xavfsizlik mezonlariga javob bergan birinchi avtomobil ekanligini ma’lum qildi. Bu haqda Techcrunch.com xabar beradi.
Yangi baholash dasturiga piyodalar uchun avtomatik favqulodda tormozlash, ko‘r nuqtalar haqida ogohlantirish, ko‘r nuqtalarga aralashuv va avtomobilni yo‘lakda ushlab turish kabi to‘rtta muhim sinov qo‘shildi. Ushbu yangilangan mezonlar zamonaviy avtomobillarning texnologik imkoniyatlarini xolis baholash maqsadida joriy etilgan.
Ushbu sertifikat 2025-yil 12-noyabr yoki undan keyin ishlab chiqarilgan Tesla Model Y avtomobillariga taalluqlidir. NHTSA ushbu sinovlarni o‘zining mashhur "5-Star" xavfsizlik reytingi dasturi doirasida amalga oshirmoqda.
Agentlik avtomobillarning to‘qnashuvlarga chidamliligi va boshqa xavfsizlik ko‘rsatkichlarini ham tekshiradi. Hozircha boshqa qaysi avtomobil modellari ushbu yangi standartdan o‘tayotgani haqida ma’lumot berilmagan.
“Zamin”ni Telegramʻda oʻqing!
