Google DeepMind tadqiqotchilari sun’iy intellekt yordamida ishlovchi yangi turdagi kursor konsepsiyasini taqdim etishdi. Ushbu texnologiya sichqoncha yordamida oddiy ko‘rsatish harakatini to‘liq interaktiv muloqotga aylantiradi. Foydalanuvchilar endilikda uzun matnli so‘rovlar yozish o‘rniga, shunchaki kerakli obyektni ko‘rsatib, «buni taqqosla», «tushuntirib ber» yoki «bu yerga ko‘chir» kabi qisqa buyruqlar berishlari mumkin. Bu haqda Ixbt.com xabar beradi.
Kompaniya mutaxassislarining fikricha, kompyuter bilan o‘zaro muloqot qilish prinsipi so‘nggi yarim asr davomida deyarli o‘zgarmagan va kursor faqat ekrandagi koordinatalarni belgilash uchun xizmat qilgan. DeepMind esa tizimni nafaqat kursorning joylashuvini, balki foydalanuvchi nimaga qarayotganini va uning niyatini tushunishga o‘rgatishni taklif qilmoqda. Bu yondashuv sun’iy intellektni kundalik interfeys ish jarayoniga uzviy bog‘lash imkonini beradi.
Yangi konsepsiya to‘rtta asosiy tamoyilga tayanadi: foydalanuvchini alohida chat-botlarga o‘tishdan xalos etish, vizual kontekstni avtomatik anglash, tabiiy tildan foydalanish va interfeys elementlarini shunchaki piksellar to‘plami emas, balki sun’iy intellekt bevosita ishlay oladigan «ma’noli obyektlar»ga aylantirish. Gemini kabi zamonaviy multimodal modellar ushbu mexanizmni amalga oshirish uchun yetarlicha rivojlangan.
Google ushbu texnologiyani o‘z mahsulotlariga bosqichma-bosqich joriy etmoqda. Masalan, Google Chrome brauzerida Gemini yordamida veb-sahifalardagi aniq elementlar haqida savollar berish imkoniyati paydo bo‘ldi. Shuningdek, kompaniya kelajakdagi Googlebook noutbuklari uchun Magic Pointer funksiyasini e’lon qildi. Bu o‘zgarishlar shaxsiy kompyuter interfeysini generativ sun’iy intellekt davriga moslashtirish yo‘lidagi muhim qadamdir.
“Zamin”ni Telegramʻda oʻqing!
