Instagram yaqinda "Instants" deb nomlangan yangi funksiyani taqdim etdi. Meta kompaniyasiga tegishli ushbu ijtimoiy tarmoq mazkur formatni real vaqt rejimida sodir bo'layotgan voqealarni ulashish uchun mo'ljallangan deb ta'riflamoqda. Biroq, funksiyaning ishlash mexanizmi ko'pchilik foydalanuvchilar uchun tushunarsiz bo'lib, bu tasodifiy suratlar yuborilishiga sabab bo'lmoqda. Bu haqda Techcrunch.com xabar beradi.
Muammo shundaki, kamera tugmasini bosishingiz bilan surat avtomatik ravishda barcha "Friends" ro'yxatidagi foydalanuvchilarga jo'natiladi. Agar siz sozlamalarni oldindan "Close Friends" ga o'zgartirmasangiz, surat barchaga ko'rinadi. Garchi Meta xato yuborilgan suratni "undo" qilish imkonini bersa-da, ko'pchilik foydalanuvchilar bu jarayonni murakkab va shaxsiy maxfiylikka zid deb hisoblamoqda.
Agar siz ushbu funksiyadan foydalanishni istamasangiz, uni butunlay o'chirib qo'yishingiz mumkin. Buning uchun profilingizdagi sozlamalar bo'limiga o'ting, "Content Preferences" menyusini tanlang va "Hide Instants in Inbox" opsiyasini yoqing. Shundan so'ng, Instants bo'limi sizning xabarlar qutingizdan yo'qoladi.
Shuningdek, funksiyani butunlay o'chirmasdan, vaqtincha yashirish imkoniyati ham mavjud. Buning uchun xabarlar qutingizdagi Instants belgisi ustiga bosib turing va o'ngga suring. Bu sizga funksiyani vaqtincha to'xtatib turish imkonini beradi.
“Zamin”ni Telegramʻda oʻqing!
