Dori vositalarini kashf etish zamonaviy sanoatdagi eng qimmat va murakkab jarayonlardan biri hisoblanadi. Yangi molekulani topish oʻn yillab vaqt va milliardlab mablagʻ talab qilishi mumkin, biroq koʻp hollarda bu urinishlar samarasiz yakunlanadi. Sunʼiy intellekt sohasidagi startaplar bu muammoni hal qilishga vaʼda bergan boʻlsa-da, aksariyat vositalar faqat yuqori texnik bilimga ega mutaxassislar uchun moʻljallangan edi. Bu haqda Techcrunch.com xabar beradi.
SandboxAQ kompaniyasi bu jarayonni soddalashtirish maqsadida Anthropic bilan hamkorlik qildi. Endilikda kompaniyaning ilmiy sunʼiy intellekt modellari toʻgʻridan-toʻgʻri Claude platformasiga integratsiya qilindi. Bu esa tadqiqotchilarga murakkab hisoblash infratuzilmasisiz, oddiy suhbat interfeysi orqali dori vositalari va materialshunoslik boʻyicha ilgʻor vositalardan foydalanish imkonini beradi.
Alphabet tarkibidan ajralib chiqqan va Google sobiq bosh direktori Erik Shmidt raislik qiladigan SandboxAQ oʻzining «fizika qonunlariga asoslangan» (LQMs) modellari bilan ajralib turadi. Ushbu modellar matnli naqshlarga emas, balki real dunyo qonuniyatlariga tayanadi. Ular kvant kimyosi hisob-kitoblarini amalga oshirib, molekulyar dinamika va kimyoviy reaksiyalarni laboratoriya sinovlarigacha modellashtira oladi.
SandboxAQ kompaniyasining AI simulyatsiyasi boʻyicha bosh menejeri Nadia Xarhenning taʼkidlashicha, bu birinchi marta ilgʻor miqdoriy modelning LLM (katta til modeli) bilan birlashuvidir. Ilgari foydalanuvchilar ushbu modellarni ishga tushirish uchun oʻzlarining raqamli infratuzilmasiga ega boʻlishlari shart edi. Endi esa farmatsevtika va sanoat kompaniyalari tadqiqotchilari tabiiy til yordamida oʻz ilmiy muammolariga yechim topishlari mumkin.
“Zamin”ni Telegramʻda oʻqing!
