Shu oy boshida Anthropic kompaniyasi 300 megavattli hisoblash quvvatini sotib olish boʻyicha kelishuvga erishib, sunʼiy intellekt olamini hayratda qoldirdi. Kompaniya Tennessi shtatining Memfis shahri yaqinida joylashgan Colossus 1 maʼlumotlar markazining butun quvvatini band qildi. Maʼlum boʻlishicha, bunday miqyosdagi hisoblash resurslari arzon turmaydi. Bu haqda Techcrunch.com xabar beradi.
SpaceX kompaniyasining SECʼga taqdim etgan S-1 hujjatlariga koʻra, Anthropic 2029-yilning may oyiga qadar xAI kompaniyasiga har oy 1,25 milliard dollar toʻlab boradi. Dastlabki ikki oyda xAI oʻz quvvatlarini toʻliq ishga tushirguniga qadar chegirmali tarif amal qiladi. Umumiy hisobda ushbu kelishuv xAI uchun 40 milliard dollardan ortiq daromad keltirishi kutilmoqda.
Ushbu bitim xAI kompaniyasiga infratuzilmadagi foydalanilmayotgan hisoblash quvvatlarini monetizatsiya qilish imkonini beradi. Shartnoma shartlariga koʻra, har ikki tomon ham 90 kunlik ogohlantirish bilan kelishuvni bekor qilishi mumkin. Kompaniya kelajakda boshqa shunga oʻxshash xizmat koʻrsatish shartnomalarini imzolashni rejalashtirayotganini maʼlum qildi.
Mazkur qadam xAIʼni bozorda gibrid oʻyinchiga aylantirdi. Odatda kompaniyalar maʼlumotlar markazlarini yoki oʻzlari uchun, yoki boshqalarga ijaraga berish uchun quradilar. "Neocloud" deb atalayotgan ushbu yangi model AI kompaniyalariga oʻz resurslari ortib qolganda bulutli provayder sifatida ish yuritib, infratuzilma xarajatlarini qoplash imkonini beradi.
Tahlilchilarning fikricha, xAI oʻz hisoblash quvvatlarini haddan tashqari koʻp qurib yuborgan va endi ularni ommaviy aksiyalar savdosiga chiqishdan oldin monetizatsiya qilish yoʻllarini qidirmoqda. Soʻnggi oylarda xAIʼning asosiy yordamchisi boʻlgan Grok foydalanuvchilari soni sezilarli darajada kamaygani sababli boʻshab qolgan serverlar endilikda uning eng yaqin raqobatchisiga sotilmoqda.
“Zamin”ni Telegramʻda oʻqing!
