Qondagi glyukoza miqdorining me’yordan chetga chiqishi inson salomatligi uchun jiddiy xavf tug‘dirishi mumkin. Bu holat ikki xil yo‘nalishda namoyon bo‘ladi: gipoglikemiya — glyukoza darajasining tushib ketishi va giperglikemiya — uning ortishi.
Gipoglikemiya, ya’ni qonda shakar miqdorining past bo‘lishi quyidagi holatlar sababli yuzaga keladi: noto‘g‘ri ovqatlanish, ovqatni uzoq vaqt yemaslik, qattiq jismoniy zo‘riqish yoki diabet dorilarini noto‘g‘ri qabul qilish.
Uning alomatlariga qaltiroq, yurak urishining tezlashishi, bosh aylanishi, ko‘rishda muammo va hatto hushdan ketish kiradi. Bu holat vaqtida bartaraf etilmasa, og‘ir oqibatlarga olib kelishi mumkin.
Giperglikemiya esa qonda glyukoza miqdorining ortishi bo‘lib, ko‘pincha qandli diabet bilan bog‘liq holat hisoblanadi. Ammo stress, gormonal buzilishlar yoki ortiqcha uglevod iste’moli ham bunga sabab bo‘lishi mumkin.
Uning belgilaridan biri — tez-tez chanqash va ko‘p suyuqlik iste’mol qilish, tez-tez siyish, terining quruqligi, xastalikdan charchoq va jarohatlarning sekin bitishi hisoblanadi.
Har ikki holat ham jiddiy nazoratni talab etadi. Qondagi glyukoza darajasini muntazam kuzatib borish, sog‘lom ovqatlanish va shifokor tavsiyalariga amal qilish — sog‘lom hayot kafolatidir.
