Ўзбекистон ва БАА ўртасида иқтисодий шерикликнинг янги даври бошланди

Ўзбекистон ва Бирлашган Араб Амирликлари (БАА) етакчилари иқтисодий шерикликнинг янги даврини бошлашга келишиб олишди, дея хабар берди Ўзбекистон президенти матбуот хизмати.

Абу-Дабидаги "Қаср аш-Шати" қароргоҳида Ўзбекистон президенти Шавкат Мирзиёев ва БАА президенти шайх Муҳаммад Ол Наҳаён тор доирада ҳамда расмий делегациялар аъзолари иштирокида музокара ўтказишди.

Етакчилар иқтисодий ҳамкорликнинг янги моделини, жумладан сунъий интеллект, рақамлаштириш, "яшил" энергетика, шаҳарсозлик ва инфратузилма, туризм, хусусий бизнес каби 6 та асосий йўналишни белгилаб олишди.

Ҳар бир устувор соҳа бўйича алоҳида ишчи гуруҳлар ташкил этишга келишилди.
“Томонлар 2025-2027 йилларни "Ўзбекистон ва БАА ўртасидаги иқтисодий ҳамкорликнинг янги даври" деб эълон қилиш таклифини қўллаб-қувватлашди”, — дейилган хабарда.

Шу маънода, 2030 йилга қадар ўзаро савдо ҳажмини 10 баробарга кўпайтириш ва инвестиция портфелини 50 миллиард долларга етказишга қаратилган чора-тадбирларни амалга ошириш асосий вазифа этиб белгиланди.

Ўзбекистон икки мамлакат ишбилармон доиралари ўртасидаги алоқаларни янада мустаҳкамлаш ва БАА компанияларининг юртимиздаги инвестициявий фаолиятини кенгайтиришдан манфаатдорлиги қайд этилди.

Маданий-гуманитар алмашинув кўламини ошириш масалаларига алоҳида эътибор қаратилди.
“Давлатимиз раҳбари Муҳаммад бин Зоид номидаги университет билан ҳамкорликда юқори малакали кадрлар тайёрлаш ва сунъий интеллект соҳасида илмий тадқиқотлар олиб бориш бўйича қўшма дастурни ишга туширишни таклиф этди”, — дейилади хабарда.

Музокаралар давомида бўлажак олий даражадаги тадбирларга, шу жумладан, жорий йилда Самарқандда ўтказиладиган "Марказий Осиё - Кўрфаз араб давлатлари ҳамкорлик кенгаши" мулоқотининг иккинчи саммитига тайёргарлик масалалари муҳокама қилинди. “Замин” янгиликларини “Telegram”да кузатиб боринг