Дам олиш кунллари Ўзбекистонда юқори ҳароратли иссиқлик ҳукмрон бўлади

Келаётган дам олиш кунлари Ўзбекистон аҳолисини яна бир бора чидаб бўлмас иссиқлик кутмоқда. Бу ҳақда Ўзгидромет маълум қилмоқда.

Мамлакат ҳудудига жанубий томонлардан жуда ҳам қуруқ ва қаттиқ қизитувчи ҳаво оқимлари кириб келиши давом этади. Бу ҳаво массалари натижасида мамлакатнинг катта қисмида термометр сўнгги йилларда кузатилмаган даражаларни қайд этиши мумкин.

Кундузги пайтларда ҳаво ҳарорати +40…+43 даражагача, айрим ҳолатларда эса мамлакат жанубида ва кенг чўл ҳудудларида +44…+45 даражагача кўтарилиши эҳтимолдан холи эмас. Бундай иссиқлик инсон саломатлигига таъсир қилиши мумкин, айниқса ёши катталар ва болалар учун бу янада хавфли бўлади.

Шу билан бирга, фақатгина шимоли-ғарбий вилоятларда, яъни Қорақалпоғистон Республикаси ва Хоразм вилоятида бироз салқинлик ҳис қилиниши мумкин. Хусусан, якшанба куни бу ҳудудларда кундузи ҳарорат +35…+38 даражани ташкил этади.

Республика бўйлаб айрим ҳудудларда шамол тезлиги 13–18 метр/сониягача етиши, бу эса чанг-тўзонлар ва ҳаво ифлосланишига олиб келиши мумкин. Бу каби табиий ҳодисалар нафас йўллари муаммоси бор инсонлар учун ноқулай шароит яратиши мумкин.

Пойтахт Тошкентда эса асосан осмон очиқ бўлиши кутиляпти. Ҳаво кечаси +24…+27 даража, кундуз эса +40…+43 даража атрофида бўлади. Бу дегани — шанба ва якшанба кунлари Тошкентда ҳам ердан иссиқлик уфуриб туради.

Мутасаддилар аҳолини ўзини асрашга, шамолдан ва қуёш тўғридан-тўғри нурларидан ҳимояланишга чақирмоқда. Имкони борича соя жойларда қолиш, кўпроқ сув ичиш ва ички муҳитни салқин ушлаш тавсия этилмоқда.

Бу иссиқ кунларда ҳар бир фуқаро ўз саломатлигини биринчи ўринга қўйиши, кераксиз ҳаракатлардан ва қуёш тафтида юришдан қочиши зарур. Чунки бундай об-ҳаво шароитида ҳатто бир неча дақиқа кўчада юриш ҳам организмига жиддий таъсир кўрсатиши мумкин. «Замин»ни Telegram’да ўқинг!