Коррупсияга қарши курашиш агентлиги маълум қилишича, Uzbekistan Airports АЖ томонидан амалга оширилган 6,8 миллиард сўмлик давлат хариди қонун ҳужжатларига зид равишда ўтказилган.
Ҳисоботларга кўра, ушбу харид “боди-камераларни етказиб бериш, ўрнатиш ва ишга тушириш хизмати”ни амалга ошириш бўйича тендер шаклида ташкил этилган.
Бироқ танлов жараёнида қатор қонунбузарлик ҳолатлари кузатилган: иштирокчилар тақдим этган ҳужжатлар тўлиқ ва холис баҳоланмаган, ўзаро боғлиқ ва манфаатдор компаниялар иштирок этган.
Шунингдек, баҳолаш жараёнида бир неча хато ва камчиликларга йўл қўйилгани аниқланган. Ушбу ҳолатларни Агентлик махсус таҳлил орқали тасдиқлаган.
Натижада, Агентлик тақдимномаси асосида тендер комиссиясининг ғолибни аниқлаш бўйича баённомалари бекор қилинди ва ноқонуний давлат хариди олди олинди.
Жараён давомида йиғилган барча расмий ҳужжатлар ҳуқуқий баҳо бериш учун ҳуқуқни муҳофаза қилувчи органларга юборилган.
«Замин»ни Telegram’да ўқинг!
