30 август куни Ўзбекистон Республикаси Президенти Шавкат Мирзиёев мамлакатимиз жамоат ва диний ташкилотлар билан самарали ҳамкорлик алоқалари ўрнатишда фаолият кўрсатган собиқ давлат маслаҳатчиси, марҳум Рустам Собирович Қосимовни “Фидокорона хизматлари учун” ордени билан расман тақдирлади. Бу ҳақда тегишли фармон 30 августда имзоланиши маълум қилинган.
Фармонда таъкидланишича, марҳум Қосимов ўзининг кенг билимлари ва юқори салоҳияти, ташаббускорлиги ва ташкилотчилик қобилияти орқали юртимизда соғлиқни сақлаш тизими, таълим-тарбия жараёнлари, илм-фан, дипломатия, маданият ва спорт соҳаларининг ривожланишига муҳим ҳисса қўшган. Шунингдек, у юқори малакали мутахассисларни тайёрлаш, миллатлар ва динлараро ҳамжиҳатликни мустаҳкамлаш, барқарорлик ва тинчликни таъминлаш, ёш авлодни Ватанга муҳаббат ва садоқат руҳида тарбиялашда кўрсатган ибратли хизматлари билан ҳам эътироф этилмоқда.
Фармонда шундай дейилади:
“Мамлакатимиз мустақиллигини ва унинг маънавий асосларини мустаҳкамлаш, ўзининг катта билим ва салоҳияти, ташаббускорлик ва ташкилотчилик фазилатлари билан юртимизда соғлиқни сақлаш, таълим-тарбия, илм-фан, дипломатия, маданият ва спорт соҳаларини ривожлантириш, юқори малакали кадрларни тайёрлашга қўшган улкан ҳиссаси, жамиятимизда тинчлик ва барқарорлик, миллатлар ва динлараро дўстлик ва ҳамжиҳатликни кучайтириш, миллий ва умумбашарий қадриятларни кенг тарғиб этиш, ёш авлодни Ватанга муҳаббат ва садоқат руҳида тарбиялаш йўлида кўрсатган жонбозлиги ҳамда таваллудининг 70 йиллиги муносабати билан таниқли давлат ва жамоат арбоби, олим ва педагог, марҳум Қосимов Рустам Собирович “Фидокорона хизматлари учун” ордени билан мукофотлансин”.
Маълумот учун, Рустам Қосимов 1956 йил 30 августда Тошкент шаҳрида туғилган. У турли йилларда Олий ва ўрта махсус таълим вазирининг биринчи ўринбосари, Олий ва ўрта махсус таълим вазири, Бош вазирнинг таълим, соғлиқни сақлаш, ижтимоий соҳалар ва ёшлар сиёсати бўйича ўринбосари лавозимларида фаолият кўрсатган. Шунингдек, у Президентнинг фан, таълим, соғлиқни сақлаш ва спорт соҳаларида давлат маслаҳатчиси, шунингдек, жамоат ва диний ташкилотлар билан алоқалар бўйича давлат маслаҳатчиси сифатида ҳам хизмат қилган.
«Замин»ни Telegram’да ўқинг!
