Ўзбекистонда қарийб 290 минг нафар фуқаро ҳуқуқбузарлик содир этиш эҳтимоли юқори бўлган шахслар сифатида махсус профилактик рўйхатга киритилган. Бу ҳақда 27 август куни бўлиб ўтган матбуот анжуманида ИИВ Ҳуқуқбузарликлар профилактикаси хизмати бошлиғи ўринбосари Раҳимжон Наимов маълум қилди.
Маълум қилинишича, рўйхатдаги шахслар доимий равишда назоратда ушланиб, тузалиш йўлига кирганлар, узоқ муддатли хориж сафарига чиққанлар ёки вафот этганлар мунтазам равишда рўйхатдан чиқариб борилади. Бу жараён ҳуқуқий ва ижтимоий жиҳатдан ҳам тўғри амалга оширилади.
Амалдаги қонунчиликка мувофиқ, рўйхатга илгари судланган шахслар, айрим маъмурий ҳуқуқбузарликларни содир этганлар, махсус тарбиявий муассасалардан қайтганлар ҳамда жиноят ишлари тугатилган, аммо расман реабилитация қилинмаган фуқаролар киритилади. Шунингдек, “Ҳуқуқбузарликлар профилактикаси тўғрисида”ги қонунга янгича ўзгартишлар киритилиши режалаштирилмоқда. Янги қонун лойиҳаси қабул қилинса, ҳисоб тоифалари 4 та асосий гуруҳга қисқартирилади ва рўйхатдаги шахслар сони қарийб 60 фоизга камаяди.
ИИВ вакили таъкидлаганидек, ушбу рўйхат фуқароларни жазолаш ёки ҳуқуқларини чеклашга эмас, балки уларга юридик, психологик, педагогик ва ижтимоий ёрдам кўрсатишга қаратилган. “Бу рўйхат шахсларнинг ҳуқуқларини чекламайди. Аксинча, муаммоларини аниқлаб, маҳаллий мутасаддилар билан биргаликда ижтимоий мослашув дастурлари ишлаб чиқилади ва амалга оширилади”, — деди вазирлик расмийси.
«Замин»ни Telegram’да ўқинг!
