Миллий статистика қўмитаси маълумотларига кўра, 2025 йил август ойи ҳолатида мамлакат ҳудудлари бўйича 1 килограмм палов тайёрлаш қанчага тушиши ҳисоблаб чиқилди. Ушбу кўрсаткичлар палов халқона таом сифатида ҳар бир ҳудудда қанча харажат талаб қилиши мумкинлигини кўрсатиб бермоқда.
Маълумотларга қараганда, энг арзон палов Қорақалпоғистон Республикасида тайёрланса (98 600 сўм), энг қиммат ҳисоб Тошкент шаҳрида қайд этилди – 117 400 сўм. Бошқа ҳудудлардаги кўрсаткичлар эса қуйидагича шаклланди:
— Андижон вилояти – 105 500 сўм,
— Бухоро вилояти – 108 400 сўм,
— Жиззах вилояти – 110 000 сўм,
— Қашқадарё вилояти – 111 700 сўм,
— Навоий вилояти – 110 000 сўм,
— Наманган вилояти – 109 400 сўм,
— Самарқанд вилояти – 113 400 сўм,
— Сурхондарё вилояти – 111 500 сўм,
— Сирдарё вилояти – 105 700 сўм,
— Тошкент вилояти – 113 600 сўм,
— Фарғона вилояти – 115 000 сўм,
— Хоразм вилояти – 107 000 сўм.
Шу тариқа, кўриниб турибдики, палов тайёрлаш учун сарфланадиган маблағ ҳудуддан ҳудудга фарқ қилади.
Бир килограмм палов тайёрлаш учун асосий маҳсулотлар миқдори қуйидагича белгиланган:
— кунгабоқар ёғи – 0,3 литр,
— пиёз – 300 грамм,
— мол гўшти – 700 грамм,
— сабзи – 1 килограмм,
— гуруч – 1 килограмм,
— нўхат – 100 грамм,
— зира – 10 грамм,
— ош тузи – 20 грамм.
Таъкидланишича, юқорида қайд этилган рақамлар бозорларда сотиладиган паловнинг тайёр ҳолдаги нархи эмас. Улар маҳсулотларнинг ўзинигина эмас, балки таом тайёрлаш жараёни, хизмат харажатлари ва қўшимча ишлов учун кетадиган маблағни ҳам ўз ичига олади.
Палов — Ўзбекистон миллий ошхонасининг рамзига айланган таом бўлиб, унинг тайёрланиш нархи ҳам жамиятда катта қизиқиш уйғотади. Ҳар бир ҳудуддаги иқтисодий шароит, маҳсулотлар нархи ва хизмат кўрсатиш харажатлари умумий қийматга ўз таъсирини ўтказиши эса табиий ҳол ҳисобланади.
«Замин»ни Telegram’да ўқинг!
