Ўзбекистонлик машҳур альпинист Диёр Ҳайдаров Альп тоғларида жойлашган ва дунёнинг энг машҳур, шу билан бирга жуда мураккаб саналган чўққиларидан бири — Matterhorn (4478 метр) тоғини муваффақиятли равишда забт этишни уддалади. Бу ютуқ нафақат унинг шахсий спорт карьераси учун, балки мамлакатнинг халқаро спорт майдончасидаги нуфузи учун ҳам муҳим саналади.
Кўтарилиш Швейцариянинг машҳур Zermatt шаҳридан (1620 метр) бошланган. Дастлаб, спортчи Хорнли бошпанасигача (3260 метр) етиб борди ва қисқа акклиматизация машғулотларини амалга оширди. Эрта тонгда жамоа билан қийин тошли тизмалардан ҳаракатланиб, 4000 метр баландликда музли қисмларга дуч келди. Бу жараёнда Ҳайдаровнинг крампонлари билан боғлиқ техник муаммо юзага чиқди, аммо тажрибали альпинист муз болтасидан фойдаланиб, йўлни давом эттирди ва қийинчиликларни муваффақиятли енгиб чиқди.
Қийин шароитларга қарамай, Диёр Ҳайдаров тўрт соат ичида Matterhorn чўққига чиқди ва беш соат ичида хавфсиз равишда пастга тушди. Унинг мазкур кўтарилиши нафақат физик барқарорлик ва техника талаб қилган, балки психик барқарорлик ва тажрибани ҳам синовдан ўтказди.
Диёр Ҳайдаровнинг илгариги ютуқлари ҳам эътиборга сазовор. 2025 йил июл ойида у Озарбайжоннинг энг баланд нуқтаси — Бозардузу чўққиси (4466 метр)ни забт этган. Шунингдек, 2021 йилда Помир тоғларидаги Абу Али ибн Сино чўққисига (7134 метр) кўтарилиб, давлат мустақиллигининг 30 йиллигига бағишлаб Ўзбекистон байроғини фахр билан кўтарган.
Унинг сўнгги ютуғи ўзбекистонлик спортчиларнинг халқаро альпинистик майдондаги фаол иштирокини яна бир бор кўрсатди. Бу каби муваффақиятлар нафақат мамлакат спорти учун илҳом манбаи, балки маҳаллий ёшлар учун ҳам улкан илҳом ва спортга қизиқиш уйғотувчи омил бўлиб хизмат қилади.
«Замин»ни Telegram’да ўқинг!
