Наманган вилоятидаги машҳур “Чортоқ” сувомбори атрофида туризмни ривожлантириш мақсадида замонавий комплекс, меҳмонхона, ресторанлар, дам олиш ҳамда кўнгилочар масканлар ташкил этилиши режалаштирилмоқда. Бу ҳақда 16 сентябрь куни Президент Шавкат Мирзиёев раислигида бўлиб ўтган Наманган вилоятини ижтимоий-иқтисодий ривожлантиришга бағишланган йиғилишда маълум қилинди.
Йиғилишда таъкидланишича, Жаҳон банки билан ҳамкорликда амалга оширилаётган Ўрта шаҳарларни ривожлантириш лойиҳаси доирасида жорий йилда “Фурқат” боғи қайта реконструкция қилиниб, ҳудуди қарийб 2 баробар кенгайтирилади. Шунингдек, Чортоқсой бўйлаб 11 километр узунликда экологик эко-йўлаклар, пиёдалар ва велосипедчилар учун махсус маршрутлар қурилади.
Жадал туризм комплексини ривожлантириш дастури доирасида Чортоқсой ва Катта Наманган канали қирғоқларининг 7 километри бетонлаштирилади ва 30 гектар ер майдони фойдали, самарали майдонга айлантирилади. Бу ердаги кўп йиллик боғлар ва табиатни уйғунлаштирган ҳолда санаторий типидаги йирик сервис объектлари ҳам барпо этилиши режалаштирилмоқда.
Шу тариқа, “Чортоқ” сувомбори атрофида нафақат туризм комплекси, балки меҳмонхона, ресторанлар, дам олиш ва кўнгилочар масканлар ҳам ташкил этилади, бу эса вилоятнинг туризм салоҳиятини сезиларли даражада оширишга хизмат қилади.
Бундан ташқари, яна бир йирик лойиҳа – Поп туманидаги Арашан кўли атрофида 1200 гектар майдонда барпо этиладиган йирик туризм комплекси ҳисобланади. Бу маскан йилига 1 миллион сайёҳни қабул қилиш қудратига эга бўлиб, вилоят туризм секторидаги инвестиция ва жаҳон миқёсидаги имиджни янада мустаҳкамлайди.
Туризм соҳасидаги катта лойиҳалар учун малакадор кадрларни тайёрлаш мақсадида кейинги ўқув йилидан бошлаб Австриянинг Кремс университети билан ҳамкорликда Наманган давлат университетида қўшма факультет ташкил этилади. Бу ёш мутахассисларни замонавий билим ва амалиёт билан таъминлайди.
«Замин»ни Telegram’да ўқинг!
