Киев вилоятида одамларни ноқонуний эксплуатация қилиш билан шуғулланган гуруҳ фош этилди. Украина прокуратураси маълумотига кўра, жиноятчилар орасида Хитойнинг икки фуқароси, бир ўзбекистонлик ва бир украиналик аёл бор. Улар қўлга олинган ва ҳозирда эҳтиёт чораси масаласи кўриб чиқилмоқда.
Тергов маълумотларига кўра, гумонланувчилар уй-жойсиз ва оғир моддий аҳволда қолган шахсларни алдаш ҳамда мажбурлаш йўли билан қулликка жалб қилган.
Маълумотда айтилишича, одамлар қаттиқ назоратда сақланган, ишлашга мажбур қилинган ва ҳаракат эркинлиги чекланган. Уларга нисбатан ҳаддан ташқари камситиш ҳолатлари кузатилган: ҳатто ҳожатхонага чиқиш ҳам белгиланган вақтда рухсат этилган, майда қоидабузарлик учун эса жарима солинган.
Ҳуқуқ-тартибот идоралари жиноятчилар яшаган жой ва хўжалик объектларини аниқлади. У ерда ғайриинсоний шароитда сақланган 13 нафар Ўзбекистон фуқароси топилди.
