Агар сиз Навоий вилоятидаги қадимий Сентоб қишлоғига борсангиз, кўз олдингизда тошдан барпо этилган уйлар ва иншоотлар намоён бўлади. Бу жой шунчаки оддий қишлоқ эмас — тарих, маданият ва табиат уйғунлиги акс этган ҳақиқий ноёб маскандир. Айни вақтда Сентоб туризм қишлоғи мақомини олган бўлиб, маҳаллий ва хорижий сайёҳларни ўзига тобора кўпроқ чорламоқда.
Навоий тоғ бағрида жойлашган ушбу қишлоқда қарийб уч минг аҳоли истиқомат қилади. Сентоб ўзининг сўлим табиати, бой маданий мероси ва сақланиб қолган миллий қадриятлари билан машҳур. Бу ерга келган сайёҳлар нафақат гўзал манзаралардан баҳра олишади, балки қадимий цивилизация изларига ҳам гувоҳ бўлишади.
Қишлоқда йигирмага яқин меҳмон уйлари ва учта замонавий меҳмонхона ишлаб турибди. Улар орқали келган меҳмонларга қулайлик ва миллий меҳмондўстлик тақдим этилади. Энг қизиқ жиҳатлардан бири — Сентоб ўзининг тарихий архитектура кўринишини сақлаб қолгани. Шу боис бу ерга ташриф буюрган одамлар қадим замон одамларининг турмуш тарзини ҳис қилиш имконига эга бўлишади.
Сентобнинг яна бир ўзига хослиги — унинг географик жойлашуви. Қишлоқдан 30 километр нарида Айдаркўл жойлашган бўлиб, у Сентобнинг сайёҳлик жозибасини янада оширади. Катта кўл соҳилида саккизта ўтов оромгоҳи барпо этилган ва улар бир вақтнинг ўзида уч мингдан ортиқ сайёҳни қабул қила олади.
Расмий маълумотларга кўра, 2024 йил давомида Айдаркўлга 70 мингдан зиёд хорижий ва 450 мингга яқин маҳаллий сайёҳ ташриф буюрган. Жорий йилда эса бу рақам бироз камроқ бўлиб, 50 мингдан зиёд хорижий ва қарийб 200 минг маҳаллий сайёҳ келгани қайд этилган.
Сентоб қишлоғи бугунги кунда нафақат Навоий вилоятининг, балки бутун Ўзбекистоннинг энг қизиқарли туризм нуқталари қаторида ҳисобланмоқда. Тарих ва табиат уйғунлашган бу маскан, шубҳасиз, ҳар бир ташриф буюрган меҳмоннинг хотирасида узоқ сақланади.
“Zamin”ни Telegram'да ўқинг!
