Ўзбекистонда бир неча кун давомида ижтимоий тармоқларда муҳокама марказига айланган воқеа якунланди — Президент Шавкат Мирзиёевнинг кенжа қизи Шаҳноза Мирзиёеванинг севимли мушуги топилди. Бу ҳақда у шахсан ўзининг Instagram саҳифасида маълум қилди.
Шаҳноза Мирзиёева — Ижтимоий ҳимоя миллий агентлиги директорининг биринчи ўринбосари — ёзган постида мушугининг 11 октябрдан бери изланиб келинганини, ниҳоят у яна уйига қайтганини хурсандчилик билан билдирди.
“Мушугимиз топилди. Энди у уйда ва мен хотиржамман. Бу мўжиза!” — деб ёзган Мирзиёева. Унинг сўзларига кўра, мушукни излаш жараёнида юзлаб инсонлар ёрдам қўлини чўзган, ижтимоий тармоқларда эълонни тарқатган ва илиқ сўзлар билан қўллаб-қувватлаган.
“Ўзбекистонда шунчалик меҳрибон ва инсоний фуқаролар борлигини яна бир бор ҳис этдим. Ҳар бир қўнғироқ, ҳар бир репост биз учун катта аҳамиятга эга бўлди”, — дея миннатдорлик билдирди у.
Мирзиёева таъкидлашича, ушбу воқеа орқали у жамиятдаги яхшилик ва ҳамдардлик кучини яна бир бор англаган. “Кичик дўстларингизни асранг, чунки биз улар учун жавобгармиз”, — дея ёзувини якунлади у.
Шу тариқа, бир неча кун давом этган изланишлар севимли ҳайвоннинг омон қайтиши билан якунланди. Мушукнинг топилиши ижтимоий тармоқларда кенг қувонч билан кутиб олинди — кўпчилик буни “яхшилик ва инсонийликнинг ғалабаси” деб баҳолади.
“Zamin”ни Telegram'да ўқинг!
