Ўзбекистонда илк бор халқаро аккредитациядан ўтган “Ҳалол” сертификатлаш маркази ўз фаолиятини бошлади. Бу ҳақда Ўзбекистон илмий-синов ва сифат назорати маркази матбуот хизмати маълум қилди.
Янги ташкил этилган муассаса мазкур марказ ҳузурида фаолият юритади ҳамда Туркиянинг нуфузли Halal Accreditation Agency (HAK) томонидан халқаро стандартларга тўлиқ жавоб берадиган орган сифатида аккредитациядан ўтган.
Мазкур натижа мамлакат саноати ва экспорт салоҳияти учун муҳим ютуқ ҳисобланади. Чунки энди маҳаллий ишлаб чиқарувчилар хорижий бозорлар, айниқса Ислом давлатлари бозорларига чиқишда халқаро миқёсда тан олинган “ҳалол” сертификатига эга бўлиш имкониятига эга бўлади. Бу, ўз навбатида, Ўзбекистон маҳсулотларига бўлган ишончни оширади ва экспорт ҳажмини кенгайтиради.
Мутаҳассисларнинг таъкидлашича, “ҳалол” сертификати нафақат озиқ-овқат маҳсулотлари учун, балки косметика, дори-дармон ва хизмат кўрсатиш соҳалари учун ҳам муҳим аҳамият касб этади. Бу аккредитация маҳаллий корхоналарга халқаро бозорларда рақобатбардошликни ошириш, маҳсулот сифатини мустаҳкамлаш ва янги экспорт йўналишларини очиш имконини беради.
Маълумотларга кўра, жаҳон “ҳалол” бозори ҳажми 2 триллион АҚШ долларидан ортиқ, “ҳалол” туризм сектори эса 400 миллиард долларга яқин. Шу боис, Ўзбекистоннинг ушбу тизимда фаол иштирок этиши миллий иқтисодиёт учун катта имкониятларни яратади.
Мамлакатдаги илк халқаро “Ҳалол” марказининг фаолияти орқали ишлаб чиқарувчилар энди маҳсулотларини нафақат маҳаллий, балки Туркия, Саудия Арабистони, БАА, Малайзия ва Индонезия каби бозорларга ҳам экспорт қилиш имкониятига эга бўлади.
Мутасаддилар таъкидлашича, бу марказ нафақат сертификат бериш билан чекланмай, балки тадбиркорлар учун ўқув курслари, маслаҳат хизматлари ва сифат назорати бўйича илмий-амалий ёрдам кўрсатишни ҳам йўлга қўяди.
Шу тариқа, Ўзбекистонда халқаро “Ҳалол” стандарти асосида ишлайдиган илк марказнинг очилиши мамлакатдаги ишлаб чиқариш маданиятини янги босқичга олиб чиқади, халқаро бозорда “Made in Uzbekistan” брендига бўлган ишончни янада мустаҳкамлайди.
“Zamin”ни Telegram'да ўқинг!
