Тошкент шаҳар ҳокимлиги пойтахтда автобуслар ҳаракати самарадорлигини ошириш мақсадида алоҳида йўлаклар инфратузилмасини яратиш бўйича янгиланган режаларни тақдим этди. Янги дастур доирасида 10 та кўчада тезкор автобус ҳаракати тизими (BRT – Bus Rapid Transit) жорий этилади. Бу ҳақда ҳокимлик ахборот хизмати маълум қилди.
Маълумотларга кўра, янги лойиҳа бўйича йўлаклар умумий узунлиги 51 километрни ташкил этади. Илгариги тақдимотда бу кўрсаткич 57,5 километр бўлган. Шунингдек, аввал КҲАЙ—Паркент кўчалари қамраб олинган бўлса, янги режада уларнинг ўрнига Алишер Навоий ва Беруний кўчалари киритилган.
Янги тизим жорий этиладиган асосий йўналишлар қуйидагилардан иборат:
Шота Руставели (5,1 км), Шаҳрисабз (3,2 км), Амир Темур (5,7 км), Янги Сергели (5,3 км), Махтумқули (1,3 км), Мирзо Улуғбек – Феруза – Юзработ (10,4 км), Лутфий ва Муқимий (5,9 км), Нурафшон (3,7 км), Қоратош – Кўкча дарвоза (4 км) ҳамда Алишер Навоий – Беруний (6 км).
Ҳокимлик маълумотларига кўра, ушбу инфратузилмани қуриш учун жами 126 миллион доллар маблағ йўналтирилади. Илгариги лойиҳа баҳосида бу сумма 110 миллион доллар атрофида бўлган.
Мутахассислар таъкидлашича, янги йўлаклар тизими пойтахт жамоат транспортининг тезкорлиги ва ишончлилигини сезиларли даражада оширади. Тошкентдаги мавжуд транспорт тизимидаги асосий муаммолар — тирбандликлар ва автобусларнинг кечикиб келиш ҳолатларини қисқартириш режалаштирилган.
BRT тизими орқали автобуслар учун алоҳида ҳаракат йўлаклари яратилади, светофорлар билан мувофиқлаштирилган “ақлли” тизим жорий этилади ва бекатлар замонавий форматда қурилади. Бу орқали фуқаролар учун қулайлик, вақт тежамкорлиги ва хавфсизлик таъминланиши кутилмоқда.
Шунингдек, янги тизим орқали йўловчилар сони ортиши ва шахсий автомобиллардан фойдаланиш қисқариши прогноз қилинмоқда. Экологлар фикрича, бу лойиҳа нафақат вақт тежайди, балки ҳаво ифлосланишини ҳам сезиларли камайтиради.
Тошкент шаҳар ҳокимлиги маълум қилишича, лойиҳа босқичма-босқич амалга оширилади. Дастлаб илғор техника ва лойиҳа ҳужжатлари асосида муҳандислик коммуникациялари янгиланади, кейинчалик эса йўл белгиларини янгилаш, пиёдалар хавфсизлигини таъминлаш ва бекатлар инфратузилмасини яратиш ишлари бошланади.
Маҳаллий мутахассислар бу тизимни амалга ошириш Тошкент транспорт тизимини янги босқичга олиб чиқишини таъкидлашмоқда. Улар фикрича, лойиҳа тўлиқ ишга туширилгандан сўнг жамоат транспорти тезлиги икки баробаргача ортиши мумкин.
Янги BRT йўналишлари фаолиятга кириши билан пойтахт йўловчилари учун тезкор, қулай ва экологик жиҳатдан тоза транспорт хизматидан фойдаланиш имконияти яратилади.
“Zamin”ни Telegram'да ўқинг!
