Куз-қиш мавсумида электр ва газ нархлари оширилмайди

Жорий йилги куз-қиш мавсумида электр энергияси ва табиий газ нархлари оширилмайди. Бу ҳақда энергетика вазири Жўрабек Мирзамаҳмудов маълум қилди.

Вазирнинг сўзларига кўра, аҳолининг барқарор таъминотини сақлаш ва ижтимоий барқарорликни таъминлаш мақсадида жорий мавсумда энергия ресурслари нархларида ўзгариш бўлмайди. Шу билан бирга, ҳукумат энергия тизимида барқарорликни сақлаш ва таъминот сифатини яхшилаш бўйича комплекс чораларни амалга оширмоқда.

Мирзамаҳмудов таъкидлаганидек, электр энергияси ва табиий газ нархлари келгуси йили май ойида инфляция даражасида индексация қилинади. Бу жараён аҳолининг манфаатларини инобатга олган ҳолда, босқичма-босқич амалга оширилиши режалаштирилган.

Энергетика вазирлиги маълумотига кўра, куз-қиш мавсумида энергия таъминотида узилишларга йўл қўймаслик, ишлаб чиқариш қувватларини самарали бошқариш ва истеъмолчиларни узлуксиз энергия билан таъминлаш устувор вазифа сифатида белгиланмоқда.

Oqiljon Muhammad

«ZAMIN.UZ» муҳаррири