Ҳарбий олийгоҳ битирувчиларига янги мажбуриятлар

Ўзбекистонда ҳарбий олий таълим муассасалари битирувчиларига қўйиладиган талаблар кучайтирилди. Президент қарори билан «Ҳарбий хизматни ўташ тартиби тўғрисида»ги низомга киритилган ўзгартишларга кўра, эндиликда битирувчилар беш йиллик хизмат мажбуриятини бажармаган тақдирда, уларнинг ўқитилиши учун давлат томонидан сарфланган харажатларни қоплаш мажбурияти белгиланди.

Янги тартибга биноан, агар битирувчи офицер лавозимида беш йил хизмат қилмаса, у таълим жараёнида давлат томонидан қилинган барча харажатларни қоплашга мажбур бўлади. Бу қоидалар фақат ҳарбий хизматни ўтовчи шахсларга эмас, балки бошқа вазирлик ва идораларга фуқаролик ходими сифатида ишга юборилган битирувчиларга ҳам татбиқ этилади.

Улар учун ҳам беш йиллик хизмат шарти белгиланган бўлиб, бу мажбурият бажарилмаган тақдирда ўқитишга сарфланган маблағлар қайтариб олинади. Ҳарбий олий ўқув юрти курсантларини тайёрлаш харажатига фақат таълим, озиқ-овқат ва кийим-кечак харажатлари эмас, балки машғулотларда ишлатиладиган мураккаб ҳарбий техникалар ва ўқ-дорилар учун сарфланган маблағлар ҳам киради.

Бу эса ҳарбий таълимни давлат учун энг қиммат олий таълим йўналишларидан бирига айлантиради.