Ўзгидромет маълумотларига кўра, 8–9 ноябрь кунлари мамлакатимиз бўйлаб об-ҳаво барқарорлашиб, ҳарорат аста-секин кўтарилади. Кейинги кунларда республика ҳудудидан совуқ ҳаво массалари тўлиқ чекинишда давом этади.
Мутасаддиларнинг таъкидлашича, 8 ноябрь куни ҳаво ҳарорати кундузи 14–17 даражагача, мамлакатнинг жанубий вилоятларида эса 18–20 даражагача илиқ бўлади. Кечалари ҳам ҳарорат сезиларли даражада кўтарилиб, ҳудудларнинг асосий қисмида илиқ об-ҳаво сақланади. Фақат шимол ва чўл ҳудудларида кечаси ва эрталаб вақтларида кучсиз совуқ сақланиши эҳтимол қилинмоқда.
Пойтахт Тошкентда ҳам дам олиш кунлари ёруғ ва ўзгарувчан об-ҳаво кутилмоқда. Ёмғир ёғиши эҳтимоли йўқ, шамол эса паст тезликда эсади. Ҳаво ҳарорати кундузи 14–16 даража илиқ, кечалари эса 1–3 даража атрофида бўлади.
Метеорологлар маълумотича, ноябрнинг иккинчи ҳафтасидан бошлаб мамлакат бўйлаб қуёшли кунлар сони кўпайиб, ҳаво тобора илиқлашади. Бу эса куз фаслининг охирги ҳафталарида аҳолининг дам олиш ва сайр қилиш фаолияти учун қулай шароит яратиши кутилмоқда.
“Zamin”ни Telegram'да ўқинг!
